Се проценува дека ракот на јајчници годишно влијае на повеќе од сто илјади жени во светот, но неговите рани симптоми тешко е да се забележат, што го прави еден од најсмртоносните облици на рак во женскиот репродуктивен систем.
Една од причините поради која ракот на јајчници тешко се открива додека не дојде до трета или четврта фаза е големината на абдоминалното подрачје и карлицата.
На почетокот, додека ракот на јајчниците расте и напредува (во првата и втората фаза), во споменатото подрачје на женското тело, се уште има доволно место внатрешните органи да се поместуваат без видливи сиптоми, кои би ја предупредиле жените дека нешто се случува.
За жал, од таа причина се случува жените да не се свесни што им се случува. Како туморот расте, а просторот станува се помал, почнуваат да се јавуваат и првите симптоми. Но, дури и покрај тоа, тие може да бидат прилично вообичаени, па ретко кој ги забележува. Впрочем, кој од нас некогаш во животот не почувствувал чувство на надуеност?
Киселини и гасови
Ако наеднаш почувствувате киселини и испуштате гасови, а тоа претходно не ви се случувало како сега – отидете на преглед. Оваа состојба може да трае неколку недели, па дури и со месеци, а ако е така, дефинитивно е причина за тревога, бидејќи често се случува токму кај жените кои се заболени од рак на јајчници, а кои не чувствуваат непријатност во подрачјето на абдоменот.
Грчеви
Ги имаат речиси сите, и мажите, и жените, и млади,и стари, па човек не може да се загрижи кога понекогаш ќе ги почувствува. За жените е типичен симптом за време на месечниот менструален циклус па оттука и склоноста да ги игнорираме како можни симптоми за некоја болест. Меѓутоа, воопшто не е необично за туморот кој се развива во карлицата да предизвика болка во долниот дел на стомакот, а со оглед на тоа дека е сличен на менструалните грчеви, повеќето ќе одмавнат со рака на нивната појава.
Болки во грбот
Не е необично при ова заболување да се појави и болка во долниот дел на грбот. Причина за тоа е притисокот што туморот со својот раст го врши на ‘рбетот. И овој симптом најчесто го игнорираме, бидејќи понекогаш сите ги чувствуваме тие болки, кои може да се појават како последица од долготрајно седење и недоволно движење. Сепак, ако станува збор за хронична болка која не престанува, а знаете дека не сте ја заработиле од долготрајно седење или стоење и од неудобно лежење, јавете се на доктор.
Проблеми со дишењето
Еден е од оние симптоми кои не се воочливи на почетокот на болеста, туку тогаш кога туморот ќе влезе третиот, па дури и во четвртиот стадиум. Како туморот во абдоменот и карлицата расте и станува поголем, почнува да врши притисок на околните органи, па така и на белите дробови. Доколку наеднаш останувате без воздух и почувствувате напор при вдишувањето и издишувањето, јавете се на лекар.
Сити сте, а не сте јаделе
Ракот на јајници, веќе напоменавме, расте во абдоменот, а како расте и отекува во стомачната празнина се насобира течност која предизвикува зголемено чувство на ситост и недостаток на апетит. Ако наеднаш почувствувате дека не сте гладни, односно дека сте сити, а не сте земале ни залак во уста, и тоа ако потрае – мора да реагирате веднаш.
Ненадејно крварење
Ако забележите дека крварите меѓу циклусите, или ако сте влезени во менопуаза, одете на гинеколошки преглед. Оваа појава можна е кај одреден број жени, но ако вие со неа со соочувате за прв пат, и покрај редовните циклуси сите години, морате тоа да го проверите. Некои тумори произведуваат хормон – естроген, кој може да предизвика периодично крварење, дури и во менопаузата.
Надуеност
Речиси сите жени, како што споменавме, се сретнале со оваа непријатна појава за време на ПМС, па и за време на менструацијата. Но, ако наеднаш почувствувате надуеност и во останатите денови, ќе треба да проверите што е причината за тоа.
