Сега е нивна сезона – искористете ја, затоа што сливите имаат бројни предности во однос на здравјето. Сливата е еден од најстарите народни лекови за регулирање на варењето. Како природен лаксатив е од големо значење бидејќи за разлика од долгите лаксативи, при консумирањето сливи, не постои опасност од создавање зависност на организмот.
Сливите, поради содржината на пектин, кој набабрува во цревата, ја омекнуваат столицата што е многу битно при лекување на хемороиди или цревни заболувања. Со регулирање на варењето превентивно се делува и против појавата на рак на дебелото црево, а пектинот го намалува и холестеролот во крвта. Сливите со помала содржина на шеќер се подобри за лекување на разни нарушувања, па затоа се препорачуваат киселкасти сорти.
Сливите помагаат во борбата против високиот холестерол и заболувањата на бубрезите, болестите на црниот дроб и ревмата. Консумирањето свежи плодови е одлична превенција од малигни тумори, а покрај тоа, го подмладува и регенерира организмот и спречува појава на брчки.
Сливите се ефикасна помош и за губење на прекумерната тежина. Богати се со калиум, минерал, кој е од суштинско значење за одржување на ацидо-базната рамнотежа и чиј недостаток во организмот доведува до замор
Според нутриционистите, сливите се наоѓаат во врвот на листата на 24 овошја со најсилен антиоксидативен ефект. Сувата слива во однос на другото суво овошје има двојно поголема антиоксидантна моќ. Во составот на сувите сливи се наоѓа концентриран сорбитол и влакна, кои им даваат поголем лаксативен ефект во однос на свежите сливи.
Во која било форма, сува или сурова, ова овошје е исклучително богато со уникатни фитонутриенти, како и неохлорогена и хлорогена киселина.
Овие супстанции припаѓаат на семејството феноли, чија антиоксидантна улога е потврдена во разни научни истражувања.
Во 100 грама сливи има дури 87 грама вода и 8 грама јаглехидрати. Од витамини има најмногу витамин Ц и E, бета-каротен и фолна киселина. Кога станува збор за минерали, покрај калиум, богати се со фосфор, магнезиум, натриум.
Кога купувате сливи, бидете сигурни дека плодовите се цврсти, неоштетени и имаат дршка. Површината треба да биде малку замаглена, што покажува дека се добро чувани. Имајќи на ум дека брзо презреваат, ослободувајќи етилен, кој го забрзува зреењето и на останатото овошје, во фрижидер може да се чуваат максимум три дена. Замрзнати сливи, по правило, може да се чуваат во замрзнувач најмногу три месеци.
