Калиумот е еден од клучните минерали неопходни за нормално функционирање на организмот. Ако неговото ниво е ниско, тогаш дел од функциите на организмот ќе бидат забавени, односно нивната работа ќе биде нарушена и, воопшто, ќе биде погодено целокупното здравје. За тоа колку калиумот е важен за организмот не се зборува често, но тој е исклучително битен за мускулната сила, за работата на нервите и за здрав кардиоваскуларен систем.
Постојана исцрпеност
Калиумот најмногу го има во авокадото, бананите, белиот грав, доматите, блитвата и спанаќот. Но дури и ако ја консумирате препорачаната дневна доза од 4.700 милиграми, може да бидете во дефицит. Имено, колку повеќе натриум внесувате во телото, толку е поголема потрошувачката на калиум. Натриумот, калиумот и магнезиумот мора да бидат во однос никој од нив да не го исклучува другиот. На секоја клетка во организмот и треба доволна количина калиум за да функционира. Ако сте исцрпени и уморни по секоја мала активност, а знаете дека сте спиеле доволно, тогаш причина може да биде недостатокот на калиум.
Слабост и грчеви
Доколку вашите оброци се состојат од чипс, чоколади и други брзи закуски, тогаш и без проверка може да претпоставите дека ви недостасува калиум. Значително намалете го внесот на сол од исхраната за да му помогнете на организмот да ја одржи потребната количина на калиум. Исто така, калиумот игра голема улога во контракцијата на мускулите, па кога нивото на калиум е ниско, може да почувствувате слабост или дури и грчеви во мускулите.
Губење на свеста
Кога организмот останува без калиум, срцевиот ритам е толку забавен што се чувствувате како да ја губите свеста. Оваа појава, секако, не може да се ограничи само на падот на калиумот во организмот, има и други причини, но ако тоа ви се случи, јавете се на доктор за да ја пронајдете вистинската причина. Хроничниот недостаток на калиум е силно поврзан со висок крвен притисок, кој е опасен по живот.
Неправилен ритам на срцето
Недостатокот на калиум може да предизвика проблеми со срцето, вклучувајќи и неправилен ритам и треперење. Покрај тоа, може да влијае и на координацијата на движењата на срцето, кои ги контролираат електричните импулси. Ако сакате да го заштитите срцето од инфаркт и други болести, бидете сигурни дека внесувате доволно калиум секој ден.
Калиумот е исклучително битен за мускулната сила, за работата на нервите и за здрав кардиоваскуларен систем
Трнење
Калиумот е исклучително важен минерал за човековиот организам, бидејќи го подобрува здравјето на нервниот систем. Ако неговото ниво е намалено, немојте да бидете изненадени доколку се појави чувство на пецкање или трнење на кое било место од телото.
Затвор и надуеност
Ниското ниво на калиум ги забавува функциите на организмот, а ни дигестивниот систем не е исклучок. Затвор и грчеви во желудникот, исто така, се можни.
Висок крвен притисок
Експертите сметаат дека калиумот ги ублажува ефектите на натриумот, кој е познат како еден од причините за висок крвен притисок. Ова е уште една причина да не дозволите да ви недостасува овој важен минерал.
