Луѓето кои со години одат кај ист доктор би можеле да живеат подолго, покажала новата меѓународна студија.
„Имавме девет различни земји на четири различни континенти – во различни здравствени системи. Затоа мислиме дека не се работи за влијанието на средината или влијанието на културата, туку дека се работи за човечки фактор“, изјавил водечкиот истражувач д-р Денис Переира Греј од здравствената установи „St. Leonard’s“ во британски Ексетер.
„Мислиме дека тоа делува на два начина. Пред се, пациентите полесно разговараат со лекарите кои ги познаваат и на кои им веруваат, дури и кога се работи за непријатни прашања“, објаснил д-р Греј. „Исто така, лекарот подобро ги разбира и има подобри информации, па може да ги прилагоди советите дадени на одреден пациент“.
Претходните истражувања покажале дека пациентите се позадоволни кога одат кај истиот општ лекар долго време и таквиот континуитет на здравствена заштита доведува до поголема веројатност дека ќе ги следат упатствата на лекарот и помала веројатност дека ќе завршат во болница“, напишал тимот на научници во текстот, објавен во списанието „BMJ Open“.
Пациентите полесно разговараат со лекарите кои ги познаваат и на кои им веруваат, дури и кога се работи за непријатни прашања
За да проверат дали влијае континуитетот на здравствената заштита на стапката на смртност научниците проучиле 22 студии, во кои биле опфатени општи лекари, како и специјалисти. Во 18 студии е констатирано дека подолгиот континуитет на здравствена заштита бил поврзан со пониска смртност, во три не е пронајдена никаква врска, а во една студија, која била базирана на бројот на барањата за исплата на осигурување, било утврдено дека подолгиот континуитет е придружен со поголема смртност.
Д-р Греј напоменал дека прашањето на континуитетот на здравствената заштита досега се сметало за прашање на комодитет, а не се третирало како здравствено прашање.
