Пациентите кај кои дошло до развој на акутен апендицитис, повеќе нема да мора да се подложат на хируршки зафат за да се отстрани воспалениот црвовиден израсток, покажала новата студија. Имено, резултатите од последното истражување покажале дека со помош на антибиотска терапија може успешно да се лекува воспаление на слепо црево (акутен апендицитис).
Повеќето случаи на акутно воспаление на апендиксот не се комплицирани, што значи дека не дошло до руптура на слепото црево, па може да се лекуваат со антибиотици.
Единствено во случаите кога изгледа дека цревото ќе прсне во секој момент, потребен е итен хируршки зафат
Споменатата разлика во изгледот на црвовидниот израсток може лесно да се види со помош на компјутеризирана томографија (CT), истакнуваат експертите.
Според нивното мислење, нема потешки компликации поврзани со антибиотската терапија и примената на антибиотици се смета за безбедна опција.
Кај 20 до 30 проценти од случаите на апендицитис доаѓа до руптура на воспалениот црвовиден израсток и е потребен итен хируршки зафат. Кај 70 до 80 отсто од случаите, доволно е само примена на антибиотици.
Исто така, треба да се напомене дека во сите случаи на лекување со антибиотици, антибиотската терапија не е секогаш успешна, па на крајот, сепак, се врши хируршки зафат. Меѓу другото, треба да се истражи нејзината ефикасност кај пациенти, кај кои црвовидниот израсток е исполнет со калцифицирани наслаги.
Антибиотската терапија се состои од три дена интравенозна апликација на антибиотици во болница и седум дена орална употреба на антибиотици, пишува JAMA.
