Луѓето кои боледуваат од сериозно пореметување со исхраната, како што е анорексија нервоза – всушност не признаваат дека имаат проблем, при што последиците може да бидат фатални. За среќа, со правилен третман и поддршка, можно е да се поврати самодовербата и здравјето. Сите ние сакаме да изгледаме добро, но кога некој страда од оваа болест, а најчесто тоа се анорексични девојки – потребата да се губат килограми станува поважно од било што друго. Притоа, лицето воопшто не е свесно дека има сериозно пореметување со исхраната, кое може да му го загрози животот.
Постојат три основни карактеристики за овој проблем: неприфаќање на здравата телесна маса, интензивен страв од гојазност и искривена слика за сопственото тело.
Говорот и изгледот на телото може да откријат многу, кога станува збор за анорексијата, а на неа укажуваат и првите симптоми на оваа болест:
- Драматично губење на килограмите
- Чувство на дебелина иако лицето е видно слабо
- Опседнатост со тежината, изгледот на сопственото тело, па дури и со големината на облеката
- Чести мерења и грижа при појава на минимални промени на телесната тежина
- Исклучиво консумирање на нискокалорични намирници, а избегнување на храна која содржи масти и јаглехидрати
- Остри критики за надворешниот изглед и трошење многу време во барање на недостатоци на сопственото тело пред огледало – ова е типично за болест позната како анорексија нервоза
- Измислување невистини за количината на изедената храна
- Користење лекови за слабеење, лаксативи или диуретици, како и претерана употреба на други средства за слабеење
- Повраќање веднаш по јадењето (често одење во тоалет за време на оброкот)
- Миење на заби и плакнење на устата, како и консумирање на голема количина на вода веднап по оброкот
- Компулсивно и фанатично вежбање откако ќе се изеде „лоша„ храна
- Постојано размислување за храната
За анорексичните луѓе секој оброк претставува исклучително стресно случување. Размислување за диетата, храната и телото им одзема повеќе време, а животот се сведува на екстремната потреба да се биде што послаб – ова е анорексија нервоза. Колку и да изгубат килограми, анорексичните девојки никогаш не се задоволни. Луѓето кои боледуваат од анорексија често не признаваат дека имаат проблем, при што последиците може да бидат и фатални.
