Во последните години се повеќе се зборува за лековитоста на аронијата. Ова зрнесто овошје е по потекло од Северна Америка. Кога се во прашање витамините и минералите, бобинките аронија содржат витамини Ц и К, како и манган и железо. Претставуваат одличен извор на антиоксиданти – фенолни киселини, флавоноли и особено антоцијанини, кои на овие бобинки им даваат карактеристично темносина до црна боја.
Токму благодарение на високото количество на антиоксиданти, на аронијата и се припишуваат противвоспалителни својства, како и протективно дејство кога станува збор за појавата на карциноми. Имено, истражувањата над животни покажале дека антоцијанините би можеле да го запрат растот и напредувањето на клетките на рак на дебелото црево.
Антиоксидантите од аронијата поволно делуваат и на кардиоваскуларното здравје – во едно истражување во кое 38 личности со метаболен синдром секојдневно земале по 300 мг екстракт од аронија било забележано намалување на нивото на триглицериди, ЛДЛ и вкупен холестерол после период од два месеца. Во друго слично истражување утврдено е дека исто количество екстракт од аронија би можело да помогне во регулирањето на зголемениот крвен притисок.
