Асс. Д-р Искра Битовска: Хормонски промени кај жените во менопауза (2)

Со влегување во менопаузата, настанува атрофија и на уроепиталот на мочниот меур и на уретрата, така што овие делови стануваат почувствителни на иритирачкиот дел на урината и доведуваат до дисурични тегоби.

Дефицитот на естрогени најмногу го погодува долниот генитален тракт. Резултат е истенчувањето на вагиналниот епител и редукција на вагиналниот трансудат, состојба која предизвикува непријатност и болки при сексуален однос. Постои и редукција во создавањето колаген. Намаленото создавање цервикална слуз уште повеќе ги влошува симптомите на сува вагина. Ендометриумот станува атрофичен. Атрофираат и лигаментите кои учествуваат во потпората на матката, грлото на вагината и самата вагина, состојба која клинички се манифестира како генитален пролапс.

Пишува: Асс. д-р Искра Битовска, Клиника за ендокринологија

Со влегување во менопаузата, настанува атрофија и на уроепиталот на мочниот меур и на уретрата, така што овие делови стануваат почувствителни на иритирачкиот дел на урината и доведуваат до дисурични тегоби. Како резултат на процесот на стареење, пред се, на недостигот на екстрогени, кожата доживува редукција на својот колаген со истенчување на површниот слој и последователна набраност. При употреба на естрогенска супституциска терапија се зголемува дермалната дебелина како резултат на зголемената репродукција на колаген кој задржува поголемо количество на вода, па кожата изгледа посочна и помазна.

Промените во односот меѓу андрогените хормони и естрадиолот во менопаузата се смета дека играат голема улога во дефинирање на ефектот во менопаузата врз кардиоваскуларниот систем.

Намалувањето на нивото на естрогените хормони доведува до зголемување на соодносот адрогени/естрадиол кај жените во менопауза; овој сооднос е понизок кај жените кои употребуваат хормонска супституциска терапија.

Андрогените индуцираат вазоконстрикција, пролиферација на мазните мускулни клетки, забрзана атеросклероза, формирање плаќи, односно проатеросклеротично артериско ремоделирање. Сето ова укажува на претпоставката дека зголемениот сооднос андрогени/естрогени кај жените во менопауза можеби е еден од механизмите кои  придонесуваат за забрзана атеросклероза кај овие жени. Зголеменото ниво на тестостерон корелира правопропорционално со степенот на атеросклерозата мерена по ангеографски пат, а во друга проспективна студија е следен трендот кон зголемен ризик од кардиоваскуларни болести кај жени со повисок однос андрогени/естрадиол.

                                                                                                          (Продолжува)