Вагиналните инфекции (вагинити или колпити), спаѓаат во групата на најчести и најраспостранети гинеколошки проблеми кај женската популација. Се јавуваат од најраната возраст (јувенилен колпит), до најстарата возраст како – сенилен колпит. Најраспостранети се во сексуално активната фаза од животот кај жените, од адолесценцијата па се до менопаузата. Доколку не се лекуваат и третираат правилно може да доведат и до несакани последици – стерилитет, спонтани абортуси и предвремени породувања (кај бремени жени), воспаленија на карличните органи и системски пореметувања.
Најчесто вагиналните инфекции се јавуваат при намалување на локалниот и системски имунитет, како сексуално преносливи болести – при честа промена на сексуални партнери, при носење на тесна и синтетска облека, недоволна хигиена, неправилна исхрана, долготрајно користење на антибиотици и други лекови
Слузницата на вагината во нормални услови е обложена со сапрофитни бактерии, од родот на Lactobacillus – (Doderlein-ови бацили), кои гликогенот го претвораат во млечна киселина и ја закиселуваат средината во вагината до ph-4, со што не се дозволува развој и намножување на патогените бактерии и габички, што ќе доведе до настанување на вагинална инфекција. Секое пореметување на киселоста во вагината предизвикано од физички агенси (зрачење, топлина), хемиски агенси (дезодоранси, креми, сапуни, шампони) или контаминација со инфективни агенси (нехигиена, нечиста долна облека или по сексуален пат), ќе доведе до пореметување на нормалната вагинална флора, намножување на патогените бактерии и габички и настанување на вагинална инфекција.
Најчести инфективни причинители на вагиналните инфекции или колпити се:
-
Габични инфекции, најчесто со родот Candida (Candida albicans, C.tropicals, C.galabrata…);
-
Бактериски вагинози, предизвикани од цревна аеробна и анаеробна флора (Streptokoki, Stafilokoki, Gonokoki, Coli-бактерии…), Gardnerella vaginalis;
-
Трихомонијази, предизвикани од Trichomonas vaginalis (протозоа);
-
Интрацелуларни бактерии (Chlamidia, Micoplasma, Ureaplasma);
-
Вирусни инфекции – HSV-2, HPV инфекции.
ГАБИЧНИ ИНФЕКЦИИ: Најчести причинители за колпити се инфекциите со габички (soor colpit). Се јавуваат поради широка употреба на антибиотици, хормонски контрацептиви, неправилна исхрана богата со јаглехидрати, кај дијабетичари и бремени жени, кај имуносупримирани и имунодефициентни пациентки ( СИДА, цитостатици).
Причинители се фитопаразити – габи, најчесто од родот Candida и кај сите погоренаведени состојби во организмот, доаѓа до нивно намножување и настанување на инфекција. Според симптомите и времетраењето, инфекцијата може да биде акутна и хронична. При акутна инфекција со Candida, покрај вагината може да бидат зафатени и вулвата и перинеумот. Симптомите се: вагинално чешање, црвенило, оток на вулвата и вагината, отежнато мокрење, засилена вагинална секреција, со густ млечно бел или засирен исцедок со беличасти налепи. При хронична инфекција, засилената вагинална секреција е долготрајна, со чешање и црвенило кое е поизразено околу менструалниот циклус и по сексуален однос.
Третманот и лекувањето на габичните инфекции се состои од користење на општи и локални антимикотици (како вагиналети, креми). Понекогаш лекувањето може да биде и подолготрајно и треба да го спроведат и двајцата партнери истовремено
Честопати се наложува потреба по лекувањето на вагиналните кандидијази, дополнително да се направи третман и со имуностимулатори и препарати со Lactobacilli.
БАКТЕРИСКИ ВАГИНОЗИ: Се вториот најчест причинител за вагинални инфекции. Тие се предизвикани од зголемен раст и намножување на аеробни и анаеробни бактерии во вагината, од кои најчеста е Gardnerella vaginalis. Симптомите се со бел, жолтеникав или зеленкаст вагинален исцедок со многу непријатен мирис и осет на чешање. Понекогаш не даваат никакви симптоми и се откриваат на гинеколошки преглед. Се лекуваат со антибиотици системски и локално. Особено е важно третирањето на бактериските вагинози за време на бременоста, бидејќи можат да доведат до спонтани абортуси и предвремено породување со сите последици.
(Во наредното продолжение: трихомонијази, инфекции со интрацелуларни бактерии, вирусни инфекции и инфекции со HPV вируси)
