Убодот (угризот) не е ни малку пријатен и затоа би требало да бидете внимателни – во природа одбегнувајте висока трева и грмушки, носете цврсти и затворени чевли, долги панталони и високи чорапи. Носете светла облека за полесно да можете да ги забележите крлежите. Изложените делови од кожата намачкајте ги со посебни гелови кои ги „бркаат“ инсектите. Слично делување имаат и етеричните масла како лаванда и геранија. Кога ќе се вратите од престој во природа детално прегледајте се.
Крлежот ќе го победите ако на проблемот му пристапите смирено. Порано се верувало дека крлежот треба да се третира со масло или алкохол, но не го правете тоа затоа што тој ќе се задуши и ќе испушти отров во раната. Тоа може да биде и тоа како опасно. За да го извадите потребна ви е тенка пинцета. Повлечете го лесно и право, без вртења за да не остане некој дел под кожата. Одбегнувајте нагли движења, гмечење или стискање. Обидете се да го извадите цел. Без паника и ако остане некој дел – мала црна дамка која ќе остане евентуално не е неговата глава, туку оружјето за убод. Него со време кожата сама ќе го исфрли. Местото на убодот и рацете измијте ги темелно и дезинфицирајте ги.
Се разбира, може да се случи да направите грешка при вадењето, па поголем дел да остане во кожата – во тој случај станува збор за главата на крлежот. Потрудете се да ја извадите, ако не сте сигурни најдобро е да побарате лекарска помош. Истото направете го и ако забележите создавање на црвен круг околу убодот. Со оглед на тоа дека симптомите често се појавуваат подоцна, посветувајте му внимание на убодот дури и по четири недели. Исто така, посветете внимание на вашата генерална здравствена состојба, појава на температура и слични симптоми.
