Срцевите заболувања повеќе нема да бидат на прво место на причини за прерана смрт на населението во светот. Од 2020 година, приматот ќе го преземат заболувањата на црниот дроб.
Во истражувањето објавено во магазинот „Lancet Medical Journal“ се наведува дека најголеми виновници за заболување на црниот дроб до 2020 година ќе бидат алкохолот и прекумерната телесна тежина, а најмногу ќе бидат погодени младите и средовечни луѓе.
Црниот дроб е еден од најважните органи во варењето на храната, а неговата забавена работа може да се забележи врз основа на неколку симптоми: замор по минимум физички напор, болки во мускулите и болки во зглобовите, главоболка која се манифестира во пределот на очите, зголемено потење и појава на акни поради токсините кои црниот дроб не може да ги процесира, алергија, запек и дијареја, депресија, анксиозност, тешкотии во концентрацијата и слично.
„Многу од нас го ризикуваат својот живот консумирајќи премногу алкохол“, вели Џуди Рис, шеф на британската Организација за заштита на здравјето на црниот дроб. „Овие бројки покажуваат дека на сите нас ни се заканува сериозна криза која ќе биде предизвикана од болестите на црниот дроб“.
Рис, исто така, апелира да се насочат повеќе ресурси кон рано откривање на болестите на црниот дроб и нивна превенција. На тој начин ќе се спасат многу животи и ќе се намалат трошоците за лекување.
