Желудочната или хијаталната хернија (кила) е состојба кога се случува пробивање на дел од желудникот во градната празнина преку отворот на дијафрагмата – мускул кој ја одвојува стомачната од градната празнина.
Желудочната кила има два типа: параезофагеална и лизгачка која се јавува кај речиси 95 % од случаите на ваков вит хернија.
Поголем процент од пациентите со хијатална хернија немаат значителни симптоми за болеста. Како најчест симптом се јавува појава на жарење и печење зад градната коска поради излевање на дел од желудочната содржина во хранопроводот. Честопати се јавува и градна болка која се шири кон грбот и е проследена со отежнато дишење. Ваквите симптоми најчесто пациентите ги збунуваат, па во таква состојба се јавуваат на кардиолог мислејќи дека имаат проблем со срцето. Како други симптоми може да се јави мачнина и повраќање, подригнување, болка во стомакот по оброк, отежнато голтање на храната и чувство на ситост и при мал внес на храна.
Оваа хернија е почест проблем за жените и лицата со прекумерна телесна тежина и причината за нејзината појава е непозната. Постојат случаи каде желудочната кила е вродена и е резултат на вроден поголем отвор на хранопроводот. Бременоста, дебелината, хроничното кашлање и состојби кои го зголемуваат притисокот во стомачната празнина се сметаат како можна причина за појава на хијатална хернија.
Кај лицата кои имаат хернија, а не чувствуваат симптоми не е потребен никаков третман. Кај овие пациенти се препорачува промена на режимот на хранење – почесто јадење помали оброци, избегнување газирани пијалаци, движење по оброк, а да се избегнува легнување веднаш по оброк, спиење на благо подигната перница и намалување на тежината ако се работи за лица со прекумерна тежина. Важно е да се следи состојбата при појава на градна болка, срцебиење и прескокнување на срцевиот ритам. Во случај кога симптомите се интензивираат и го нарушуваат квалитетот на живот лекарот ќе ви препорача хируршко лекување на состојбата.
