Иако повеќето од овошјата, како што се јаболката, бананите или крушите, се на располагање во текот на целата година, во лето се препорачува да се јаде сезонско овошје кое е дел од нашето поднебје, како лубеница, јагоди, кајсии и праски.
Летната исхрана треба да се базира на доволен внес на вода, овошје и зеленчук. Овошјето е хранливо, содржи голем број на витамини, минерали, влакна и фитонутритиенти. Распоредете ја летната исхрана во пет оброци со повисок процент на овошје и зеленчук и не заборавајте на водата. И овошјето содржи 80 до 90 проценти вода и на тој начин помага да се одржи хидрацијата на организмот. Така, на пример, лубеницата, освен хранливи материи, содржи до 92 проценти вода, а влакната во комбинација со водата во лубеницата успешно го регулираат варењето на храната и спречуваат запек, додека минералите и водата спречуваат дехидрација.
Овошје кое ја намалува желбата за благо и го чува здравјето:
Лубеница против бубрежни тегоби – Одличен извор на бета-каротен, витамин Ц, пектин, ликопен, калиум и железо. Лубеницата поради високата содржина на вода помага при проблеми со бубрезите.
Дињата го регулира крвниот притисок – Содржи повеќе од 90 проценти вода, витамин А и Ц, и калиум, минерал кој делува во регулирање на крвниот притисок. Витамин Ц во 100 г диња има 31 отсто од препорачаниот дневен внес
Кајсиите помагаат против инфекција – Одличен извор на витамин А, Ц, Б комплекси, калиум и бета-каротен. Тие му помагаат на организмот во одбрана од бактериски инфекции и ја штитат кожата од штетни сончеви зраци.
Сливите го спречуваат проблемот со запекот – Богати се со витамини А, Ц и Е и минерали, од кои најзастапен е калиумот. Сливите се препорачуваат при проблеми со запек, поради високата содржина на влакна.
Со малини против воспаленија и оштетувања – Содржат моќни антиоксиданти, кои имаат антивоспалително дејство, го спречуваат дејството на штетните микроби и оштетувањето на клетките. Тие се нискокалорични и богати со растителни влакна, добри за варење на храната.
Праски за ситост – Една праска содржи во просек само 68 калории, а дури 3 г влакна, кои придонесуваат за здравје на системот за варење. Влакната помагаат во создавање на чувството на ситост.
Боровинки за разградување на мастите – Истражувањата покажале дека штитат од болести на срцето и крвните садови и имаат антивоспалително дејство. Исто така, го стимулираат разградувањето на мастите во организмот и може да го намалат покачениот крвен притисок.
Смокви за цревата – Содржат витамин Б комплекс, витамин Е и К, калиум, калциум и магнезиум. Помагаат во контролата на нивото на шеќер во крвта, го намалуваат нивото на холестерол и позитивно влијаат на здравјето на дебелото црево.
Крушите помагаат во слабеење – Високите количини на влакна, покрај позитивниот ефект врз дигестивниот систем, се многу ефикасни во губењето на тежината. Содржат голема количина на флавоноиди и на тој начин го чуваат кардиоваскуларниот систем.
Нектарини – Содржат хлорогена киселина која има силно влијание во борбата против ракот. Богати се со антиоксиданти, поради што поволно делуваат на имунолошкиот систем.
