Низа досегашни истражувања покажале дека боровинките ги ублажуваат воспаленијата на непцата, како и дека помагаат во превенција од деменција и Паркинсонова болест, а неодамна се докажало и дека кога се консумираат редовно овозможуваат заштита од кардиоваскуларните болести.
За да дојдат до овој заклучок научниците во период од еден месец ја следеле состојбата на 40 здрави испитаници. Еден дел од испитаниците секој ден пиел напиток приготвен од 200 г боровинки, додека другиот дел добивал напиток со иста боја, а кој содржел витамини и влакна, но без антоцијанини.
Кај испитаниците од првата група, два часа после пиењето на напитокот на крвните садови било забележано заштитно дејство. Се смета дека антоцијанините ги зајакнуваат ѕидовите на крвните садови и го спречуваат нивното запушување. Исто така, после еден месец кај испитаниците дошло до намалување на притисокот за 5 mmHg.
Според проценките на авторите на оваа студија, секојдневното консумирање боровинки може да го намали кардиоваскуларниот ризик за 20 отсто.
