Брадавиците спаѓаат во најчестите заразни болести на кожата кај децата. Вистинската инциденца, веројатно, е поголема со оглед на тоа што брадавиците може и спонтано да ги снема (без терапија). Речиси секој човек до 20-тата година од животот има најмалку една брадавица на кожата. Брадавиците го поттикнуваат делумно имунитетот кој делува како заштита од инфекцијата во иднина.
Брадавиците се јавуваат на кој било дел од телото
Брадавиците се јавуваат како последица на хуман папилома вирус. Може да се појават на кој било дел до кожата или слузницата. Постојат преку 100 видови ХПВ, кои можат да придонесат различна клиничка слика на различни делови од кожата. „Обичните брадавици“ се најчест клинички облик на ХПВ инфекција кај децата. Последица се инфекциите со ХПВ тип 1, 2, 4, 7, додека рамните брадавици се последица од ХПВ тип 3 и 10.
Брадавиците најчесто се појавуваат како последица на директен контакт. Може да настанат и како последица при контакт со заразени предмет, како на пример, одење без обувки. Самопренесувањето (автоинокулација), односно пренос од едно на друго место на кожата, кај заразените лица е многу честа појава. Инкубацијата трае од неколку недели до неколку месеци и зависи од бројни факти. Двата најважни причинители се: имунолошкиот статус и чувствителноста на кожата. Дерматитисот, односно воспалението на кожата дозволува полесен влез на ХПВ вирусот во кожата.
Брадавиците се најчести на прстите и надлактиците
Кај децата брадавиците најчесто се јавуваат на прстите и надлактиците. Раните промени се поединечни и ограничени. Растат брзо и стануваат рапави (папиломатозни) површини. Кај старите брадавици се гледаат карактеристични ситни, црни точки, кои претставуваат тромбозирани капилари во папиларниот дермис. Брадавиците на стапалата на почетокот речиси се секогаш рамни. Поради јак механички притисок, со време над нив се создава заштитно задебелување. Понекогаш се спојуваат правејќи мозаик. Рамните брадавици клинички се манифестираат како мали испакнатини, со боја на кожа. Сместени се најчесто на лицето, но може да се видат и на надлактици или поколеници.
Симптоми: чешање, болки, отежнато одење
Брадавиците на стапалата често се болни и го отежнуваат движењето. На останатите делови од телото, брадавиците неретко се проследени со субјективни симптоми. Рамните брадавици, главно претставуваат исклучиво козметички проблем. Дијагнозата најчесто ја поставува самиот пациент или родителите, поради карактеристичниот клинички изглед. Дијагностички, понекогаш, кај брадавиците на стапалата е важно да се отстрани хиперкератотичниот слој (задебелена кожа).
Лекување
Општо, малите брадавици без субјективни симптоми не се лечат поради можноста од спонтана регресија (снемување). Одлуката за терапискиот избор зависи од бројот и типот на брадавиците, како и од возраста на детето.
