Слатките и пекарски производи кои се продаваат на словенечкиот пазар во иднина нема да смеат да содржат повеќе од два проценти трансмасни киселини од вкупната содржина на масти во поединечен артикл, согласно новиот правилник, кој е на сила од средата, но е предвиден и преоден период од една година поради прилагодување.
Трансмасни киселини се незаситени масни киселини кои своите посебни својства ги добиваат со индустриска преработка на растителни масла. Според некои истражувања, предизвикуваат зголемување на нивото на холестерол и може да предизвикаат проблеми со циркулацијата, да доведат до појава на атеросклероза и болест на срцевиот мускул, па постои тренд да се намали нивната употреба во прехранбените производи.
Намалувањето на количината на трансмасти Словенија ја воведе во Националната програма за исхрана, физичка активност и здравје до 2025 година.
Производителите и трговците ќе можат да ги продаваат производите кои не ги исполнуваат одредбите од новиот Правилник до истек на залихите, а целосната имплементација ќе започне откако ќе заврши едногодишниот преоден период.
Ограничувањето на содржината на трансмасни киселини важи за домашни и европски производители и трговци, како и за производи од трети земји.
