Ѕвездите ги поместуваат границите, а на изреката „баба роди дете“ очигледно и помина рокот, зашто да се стане мајка во педесеттите години од животот повеќе не е никакво чудо. Пред неколку дена актерката Бригит Нилсен на возраст од 54 години го роди нејзиното петто дете. Девојче по име Фрида.
„Пресреќни сме што можеме да и посакаме добредојде во нашите животи на нашата прекрасна ќерка. Поминавме долг пат, но вредеше. Никогаш не сме биле позаљубени“, порачала актерката, која во животот се мажела пет пати и има четири сина, од кои најстариот има 34 години.
Кога пред неколку месеци објави дека е бремена, Нилсен се најде на мета на критики и осуди од јавноста
„Како е ова можно?!“ – прашуваа дел од нејзините обожаватели, кои не штедеа зборови на критика за одлуката да роди во педесеттите години од животот. Многумина коментираа дека најверојатно се работи за вештачко оплодување, но актерката не сакаше да дава објаснувања. Нејзиниот петти сопруг, Мати Деси (39) е 15 години помлад од неа. Двојката е пресреќна што се поминало во најдобар ред.
Нилсен не е единствена. Со слични критики се соочи минатата година и Џенет Џексон, која во својата педесетта година го роди својот син првенец. Со оглед на возраста Џексон имаше ризична бременост, а поголемиот дел го мина во мирување. По веста за бременоста веднаш ја прекина турнејата и се повлече од сцената. Поради компликации, долго време криеше од јавноста дека е бремена, а веста ја објави кога беше во висока бременост.
Магазинот „Business Insider“ пишува дека секоја година се повеќе и повеќе жени остануваат бремени во четириесеттите и педесеттите години. На пример, Хали Бери го роди своето второ дете на возраст од 47 години, а пејачката Гвен Стефани (48), кој веќе има три деца, неодамна изјави дека би сакала да има повеќе.
Кога е жената премногу стара за да биде мајка?
Возраста кога жените стануваат мајки се повеќе се поместува. Од различни причини, жените првото дете го раѓаат во доцните триесетти години, а границата постојано се поместува. Во САД веќе двојно е зголемен бројот на прворотки од 45 години, а во светот владее „тренд“ многу дами за првпат да ја осетат магијата на мајчинството во време кога нивните врснички веќе си играат со внуци.
Медицината и технологијата напредуваат и го доведуваат мајчинството до неверојатна возраст
Сепак, стручњаците тврдат дека тоа претставува голем ризик за здравјето на мајките и нивните деца. Жените на таа возраст главно страдааат од висок крвен притисок, а што се однесува до бебето, постои голема можност да дојде до прерано породување или бебето да има Даунов синдром, односно аутизам.
Наспроти здравствените ризици, истражувањата покажале дека децата на постари мајки имаат поголеми шанси за одлични резултати на тестовите за интелигенција, за разлика од децата на младите мајки.
