Чајот од цвет од липа се користи традиционално како помош кај вознемиреност, респираторни инфекции и дигестивни тегоби. И навистина, чајот од липа ќе ви помогне да се опуштите на самиот крај од денот. Овој напиток делува смирувачки на нервниот систем и благодарение на благото седативно дејство се препорачува за ублажување на симптомите на анксиозност и стрес. Потпомага во опуштањето на мускулите така што може да ги намали и болките кај тензиска главоболка.
Исто така, ја подобрува циркулацијата и поттикнува потење така што се користи и за намалување на зголемената телесна температура кај настинка и грип. Помага во лекување на бронхитис и го смирува иртираното грло и кашлицата кои можат да се јават како резултат на алергија или сув и ладен воздух.
Чајот од липа, исто така, делува како диуретик и поттикнува исфрлање на наталожени течности од организмот. Уште една причина зошто би било добро дома да имате чај од липа е и неговото благотворно дејство на дигестивниот тракт. Помага кај болки во стомакот како резултат на надуеност, гасови, грчеви и дијареја.
Самиот чај се прави така што супена лажица од цвет од липа се прелева со 200 мл провриена вода. Садот се поклопува и се остава да отстои 10 минути. Чајот потоа би требало да се процеди и по желба да се заслади. Препорака е да се пијат 2 до 3 чаши чај дневно.
