Секој родител го посакува само најдоброто за своето дете, па често се јавува дилема кога станува збор за првото капење на новороденчето.
За почеток, не плашете се и не грижете се. Имајте предвид дека бебињата не се валкани, туку само треба нежно да се измијат за да може нивната кожа непречено да дише и да се развива.
Пред да почнете со капење бидете сигурни дека водата за капење е топла, не е жешка, ниту, пак, студена (температурата не смее да биде повеќе од 36 степени, а бебето не смее да се капе подолго од десет минути). Дури не ви се потребни ниту додатоци за капење, бидејќи тие може да ја исушат кожата на бебето. Доколку нивната кожа е веќе сува или чувствителна, додадете специјални масла за капење, но пред да ги употребите внимателно прочитајте го составот на средството.
ВРЕМЕ ЗА КАПЕЊЕ
• Измијте ја кадичката и рацете пред да почнете со капење на бебето.
• Сипете малку топла вода, отприлика околу пет сантиметри. Проверете ја температурата со подлактицата бидејќи таму кожата е најчувствителна. Можете, исто така, да користите и термометар. Температурата треба да биде околу 36 степени.
• Во посебен сад од страна ставете да стои малку потопла вода. Таа таман ќе се олади колку што треба кога ќе ви биде потребна за плакнење.
• Се што ви треба за капење и после капење ставете на едно место. При рака нека ви стојат чешел, шампон ако користите, масло, лосион и облека.
• Полека соблечете го бебето и земете вата или газа и чиста вода и со неа измијте ги очите и поминете го лицето на бебето. Обезбедете посебни вати за очи, лице и нос.
• Бебето полека спуштете го во водата. Додека го правите тоа зборувајте му, смејте се или пејте. Може да ја пуштите и омилената музика. Држете го бебето така што вашата лева рака ќе биде под неговите рамења, а главата потпрете ја со вашата подлактицата. Десната рака ставете ја под газето на бебето, а потоа ставете ги нозете на десната подлактица.
• При спуштањето, прво ослободете ја десната рака така што газето и нозете ќе ги спуштите во водата. Со прстите од левата рака држете го бебето под пазувите. Главата нека лежи на вашата лева рака и никако не ја спуштајте целосно во водата. Држете го бебето цврсто во коса положба така што водата ќе допира до градите. Вашата лева рака за време на капењето ќе биде зафатена, така што ќе работите со десната рака.
• Во десната рака ставете малку од средството за капење и прво измијте ја главата, па вратот, рацете, градите, стомакот, гениталиите и нозете. Делот на газето и гениталиите поминете ги два пати.
• Свртете го вашето бебе на стомак така што ќе го држите предниот дел од градите и главата преку левата рака, а бебето со колената ќе биде потпрено во кадичката. Измијте го бебето почнувајќи од вратот, грбот, газето и гениталиите.
• Подигнете го бебето над кадичката и сега искористете ја водата што ја оставивте настрана. Исплакнете го бебето. Пред употреба задолжително проверете ја температурата на водата со подлактицата. Бебето се плакне од главата надолу, кон газето и нозете. Потоа свртете го и исплакнете го целото тело од предната страна.
• Извадете го бебето од кадичката и завиткајте го во голем, мек пешкир. Не го тријте бебето, туку полека исушете го со нежно тапкање. Бидете сигурни дека пешкирот што го користите е доволно мек.
• Кога сте ја исушиле кожата и косата може да го намачкате со лосион по желба, да го преповиете во чиста пелена и да го облечете. Потоа дајте му на бебето да цица. Бебињата по капење најчесто спијат подолго време, па не е лоша идеја капењето да го правите навечер.
