Многу работи кои во одреден момент ни се чинат исправни можат да доведат до посериозни последици подоцна, една од нив е триењето на очите кога ќе почувствувате чешање. Било овој симптом да се јави на крајот од напорниот и долг ден, после спиење или после неколку часа поминати на компјутер, уморните очи едноставно не молат да ги почешаме.
Очите се сушат во текот на денот и тоа е потполно нормално. Чешањето може да доведе до размачкување на солзите по целата површина на окото и така ги влажни. Триењето на трепките ја симнува маснотијата од нив и, се чини, дека ви изгледаат посјајни. Затоа постои мошне добра причина зошто ова чувство е добро, велат стручњаците.
Но тоа всушност и не е толку добра работа. Триењето може да доведе до појава на болест на рожницата која се нарекува кератоконус, кога рожницата ослабува, го губи својот облик и влијае на видот. Се смета за ретко заболување, но го добиваат илјадници луѓе, а тоа никако не ви треба.
Триењето на очите го зголемува и очниот притисок. Така се зголемува и ризикот од глауком кој го оштетува оптичкиот нерв и доведува до губиток на видот. Сето ова е причина да престанете да ги триете очите. За среќа, постојат работи кои можат да се преземат.
Вештачките солзи ги навлажнуваат очите, а на пазарот имате голема понуда од различни произведувачи, па најдобро е да се посоветувате со вашиот лекар. Тие ќе спречат појава на црвенило и сувост на окото, која доведува до појава на чешање и поголеми проблеми.
Пробајте со топли облоги како маска за очи кога ве чешаат очите. Знаеме дека ќе ви биде тешко да ставите вакви облоги додека сте на работа, но пред одење в кревет имајте на ум дека и вашите очи заслужуваат кралски третман.
Чешањето може да се јави и заради алергија, и затоа е мошне важно да знаете на што сте алергични и да добиете соодветна терапија од вашиот лекар. Алергијата може да предизвика појава на осип во аглите од очите и така да го зголеми чешањето.
