Пијалаците и храната кои луѓето ги внесуваат за време на напорното вежбање и потоа, можат да влијаат на тоа колку брзо и добро ќе се опорават нивните мускули и колку брзо телото ќе ги надомести течностите и електролитите, изгубени за време на вежбањето, потврдиле претходните студии.
Повеќето истражувања кои се занимавале со прашањето дали пијалаците со јаглехидрати и електролити или со протеини подобро помагаат во опоравувањето, се премали за да се изведе цврст заклучок за тоа кои пијалаци се најдобри опции, наведуваат авторите на новото истражување, објавено во списанието „European Journal of Clinical Nutrition“.
За потребите на истражување биле проучувани податоци од 12 помали студии во кои се споредувало како чоколадното млеко влијае на неколку показатели на опоравување од вежбање во споредба со плацебо пијалаците или спортските пијалаци.
Спортистите се занимавале со активности како што се трчање или возење велосипед, а потоа истражувачите ги проучувале параметрите односно показателите на опоравувањето, меѓу кои и тоа колку време е потребно до потполна исцрпеност за време на вежбањето, бројот на отчукувања на срцето, нивото на млечна киселина и ензимот креатин киназа во крвта, кои растат со интензивна активност.
Истражувањето потврдило дека чоколадното млеко го продолжило времето до потполна исцрпеност и ја подобрило издржливоста, бројот на отчукувања на срцето и нивото на млечна киселина во крвта, барем онолку колку и другите спортски пијалаци, кои ги земаат спортистите за опоравување после напорен тренинг.
„Чоколадното млеко содржи јаглехидрати, протеини, масти, флавоноиди, електролити и некои витамини кои го прават овој пијалак добар за опоравување на спортистите“, изјавил лидерот на истражувањето д-р Амин Салехи- Абаргуеј од иранскиот медицински факултет „Shahid Sadoughi“.
Во некои случаи, чоколадното млеко се покажа и подобро, вели научникот, кој објаснува дека ова млеко дава слични или подобри резултати во однос на комерцијалните пијалаци. Спортските пијалаци вообичаено содржат јаглехидрати и електролити, но најчесто не и протеини, велат експертите.
