Уште една причина зошто почесто би требале да си дозволите слатко задоволство со чоколадо е и неодамнешно истражување на Британскиот национален здравствен сервис кое потврдува дека чоколадото помага и при смирување на хроничната кашлица.
Истражувања за влијанието на теоброминот на кашлицата
Во истражувањето за влијанието на теоброминот на сувата кашлица, 300 Британци со изразен проблем од суво, надразнето кашлање, биле лекувани со горчлив алкалоид од какаото – теобромин, 14 дена. Дневната доза теобромин која ја примале пациентите изнесувала 1000мг. Резултатите покажале олеснување и намалување на кашлицата кај 60% од пациентите. Во друга студија спроведена од страна на лондонскиот Национален институт за срце и бели дробови, откриено е дека теоброминот го блокира делувањето на сензорот во мозокот кој поттикнува кашлица. Блокирањето на сензорните нервни го спречува рефлексот за кашлање. Студијата покажала поголема ефикасност на теоброминот во однос на кодеинот во лекувањето на хроничната кашлица.
Теобромин од какаото
Теобрминот е горчлив алкалоид, дериват од какаото, исто така познат како и ксантеоза. Освен во чоколадото, теоброминот се наоѓа и во други прехрамбени производи кои содржат какао, како и во листовите чај.
Количината на теобромин во 100 грама темно, незасладено чоколадо изнесува околу 1600мг, а на 100грама темно, засладено чоколадо околу 500мг, додека во млечното околу 200мг. Теоброминот во модерната медицина се користи од почетокот на 20. век. Поради својот диуретски ефект, и својствата на проширувањето на крвните садови, се користи и за намалување на висок крвен притисок.
Освен теоброминот, чоколадото е вреден извор на фитохемикалии, антиоксиданти и полифеноли, кои имаат низа поволни влијанија врз здравјето на човекот. Но, сепак чоколадото не е трајно решение, бидејќи е голема веројатност кашлицата да се поврати.
Ако ве мачи сува, надразлива кашлица, еден или два реда чоколадо дневно може да ги олесни симптомите, но ако кашлицата се засили, сонот ви е пореметен, не одложувајте посета на лекар.
