Пишуваат:
Д-р сци. Александар Сајковски, педијатар и доц. д-р Катарина Ставриќ, имунолог – педијатар
Треба ли мајката да пие многу млеко за да создава доволно млеко и дали некои бебиња се алергични на мајчиното млеко? Има ли ограничување на подоите и колку честите подои може да резултираат со депресија по породувањето кај мајката? Дали млекото на мајката може да биде „слабо“? – ова се само дел од прашањата со кои секојдневно се соочуваат мајките. Во продолжение прочитајте ги вистинските одговори, од стручен аспект, на дел од заблудите поврзани со доењето.
НЕКОИ ЗАБЛУДИ ПОВРЗАНИ СО ДОЕЊЕТО
- Бебето го прима млекото само во првите 5 до 10 минути. Тоа е точно, но не може да се генерализира затоа што на некои бебиња, посебно при првите подои, им треба повеќе време.
- Нема ограничување на бројот на подоите. Тоа е условено од способноста на мајката да создава млеко, како и од потребите на бебето.
- Бебето никогаш да не се буди за да цица. Постарото бебе се буди само кога ќе огладни, но во првите недели бебето треба да се буди, така да има барем 8 подои во првите недели.
- За создавање на ритам, доењето треба да се спроведе во строго одредени временски интервали. Метаболизамот на бебето е организиран и прилагоден на неговите потреби. Нема потреба од наметнување на строг ритам на доење. Кога бебето ќе посака да цица треба да цица.
- Бебето секогаш да се дои од двете гради. Тоа не е правило и не важи за сите бебиња. Некои ги задоволуваат своите потреби и со цицање од една града.
- Ненапредувањето е резултат на „слабо“ млеко. Дури и потхранети мајки создаваат млеко кое ги задоволува квалитативните и квантитативните потреби на бебето.
- Слабото создавање на млеко се должи на стрес, замор или неправилна исхрана. Најчеста причина за слабо создавање на млеко се нередовни подои или лоша поставеност на бебето при доење.
- Мајката треба да пие многу млеко за да создава доволно млеко. За создавање на мајчиното млеко потребна е здрава исхрана богата со зеленчук, овошје, житарки и протеини. Калциумот може да се внесе со различни производи (темнозелен зеленчук, бадеми, риба).
- Мајката не треба постојано да го дои бебето. Напротив, доењето не е само начин да се задоволат нутритивните потреби на бебето, туку и овозможува емоционално поврзување на бебето со мајката, развој на орофацијалниот дел на лицето, пролонгира аменореја кај мајката, се одбегнува конфузија на бебето меѓу цуцли и града.
- Не постои конфузија меѓу брадавка и цуцла. Напротив, во првите недели бебето многу лесно може да се збуни ако цица и се дохранува со цуцла. Доењето и цицањето од шише ангажираат различни движења на лицето.
- Честите подои можат да предизвикаат депресија по породувањето кај мајката. Постпарталната депресија се должи на варијации во нивото на хормоните кај мајката по породувањето, најчесто испровоцирана со замор или недостаток на социјална поддршка од околината. Обично се јавува кај жени кои и пред бременоста имале такви проблеми.
За создавање на мајчиното млеко потребна е здрава исхрана богата со зеленчук, овошје, житарки и протеини
- Често земање и држење на бебето во раце го разгалува бебето. Држењето во раце, играњето, капењето со бебето се важни за нормалното растење и развој на бебето.
- Некои бебиња се алергични на мајчино млеко. Мајчиното млеко е најприродна храна и најфизиолошко млеко кое е наменето за бебето. Ако бебето покаже алергија на мајчиното млеко, тоа е најверојатно на протеин кој се излачува преку млекото, а што мајката го внесува преку нејзината исхрана.
- Често доење води до појава на дебелина во подоцнежната возраст на бебето. Тренд и најнови информации кажуваат дека ако се спроведува правилно доењето бебето нема ризик од дебелина, но ако перманентно се дои и дохранува со вештачко млеко тогаш постои ризик од појава на дебелина во подоцнежната возраст.
- Некои жени не можат да произведуваат доволно млеко. Обично мајката создава повеќе млеко отколку што му треба на бебето. Кога бебето цица, а не напредува, тоа се должи на недоволно цицање од страна на бебето, а не на недоволно создавање на млеко.
-
Доењето е болно. Напротив, тоа не боли, иако во првите денови мајката може да почуствува лесна болка при цицањето, но по воспоставувањето на доењето, мајката не треба да чуствува болка. Појавата на болка обично асоцира со неправилна позиција на бебето или габична инфекција.
(Продолжува)
