Пишуваат:
Доц. д-р Катарина Ставриќ, имунолог-педијатар
 Д-р сци. Александар Сајковски, педијатар

Доењето е интимно искуство кое мајката го споделува со своето бебе. Тоа не само што е најдобра природна исхрана на бебето, туку секој подој претставува период на емотивен контакт во кој мајката се поврзува со своето бебе. За таа цел таа треба да се подготви и тоа:

  • Ментално

Мајката треба да биде подготвена дека секој подој трае извесно време, а тоа не е изгубено време. Подоите се на секои 2-3 часа во траење од 20-40 минути. За бебето ова е период на емоционално поврзување со мајката што ќе му овозможи сигурност и нормален емоционален развој. Притоа, ако мајката има и друго дете, треба да му посвети доволно внимание и нему. Истовремено мајката треба да е горда поради фактот дека е способна да создава храна за своето бебе.

  • Физички

За време на доење потреба е нега на дојките која опфаќа миење со вода и неутрални сапуни. Мајката треба да носи комфорен градник, кој обезбедува доволно простор за доење. За време на доењето мајката треба да биде удобно седната во стол со добра потпора на грбот и можност за одморање на рамениците. По можност, едната нога да се крене на помало столче.

  • Нутритивно

Мајка кои дои има потреба од дополнително внесување на 500 калории дневно. Затоа е потребна урамнотежена исхрана. Доилката не треба да се грижи за својата тежина. Со здрава исхрана и физичка активност мајката лесно може да си ја поврати својата тежина по престанувањето на доењето.

ПРЕПОРАКИ

  • Веднаш по породувањето бебето треба да се постави на градата и да се почне со доење. Половина час по породувањето кај новороденото се јавува посебно изразена потреба за цицање. Иако во многу ретки случаи со тој прв подој тоа и навистина пие, сепак тоа е силен стимул за натамошно доење. Значи, важно е правилото: “Колку порано, толку побрзо ќе надојде млеко”.
  • Бебето треба да се дои по 10-15 минути на секоја града. Нема проблем ако тоа цица само од една града.
  • Честотата на подоите не е ограничена. Бебето треба да се дои колку што има потреба. Во почетокот на 2-3 часа во текот на денот. Доколку спие, а напредува добро не мора да се буди за доење. Тука е важно правилото: “Колку почесто детето е на града, толку повеќе млеко ќе се создаде.”
  • Во текот на ноќта пожелен е континуиран сон од 4-5 часа.
  • Потребно е мајката да се информира за можностите за “rooming in” системот во породилиштето. Ова е термин преземен од англосаксонската литература и значи дека мајката и новороденото се сместени заедно во соба. Тоа дава можност да се дои бебето секогаш кога на мајката и се чини дека е гладно.
  • Стимулирање на природниот рефлекс на цицање со лесен допир на образот при што бебето ја врти главата на таа страна и ја отвора устата.
  • За успешно доење потребна е подготовка на градите уште во текот на бременоста.
Пожелно е бебето да цица од двете гради или наизменично од секоја града

За успешно доење потребно е:

  1. Мајката да биде сместена удобно. Во прегратка да се постави перница на која ќе биде бебето со што се олеснува доењето. На столче може да се крене една нога, со што мајката ќе биде удобно седната и опуштена и без напнатост во рамениот појас.
  2. За време на доењето мајката да го гледа бебето во лице со што се остварува врска помеѓу нив.
  3. Телото на бебето е блиску до дојката. Главата и рамениците на бебето да се во права линија. Лицето да е свртено кон дојката, а носот поставен спроти брадавицата.
  4. Бебето се придржува за задникот.
  5. Со лесна стимулација на усната на бебето се стимулира рефлексот на вртење со што бебето ја врти главата кон брадавката и ја отвора широко устата.
  6. Со брзо движење се придвижува бебето кон градата, a не градата кон бебето, со неговата долна усна под дојката. Брадата на бебето се потпира на градата.
  7. При доење, бебето да ја цица целата ареола, а не само брадавицата. Мајката ја придржува градата така што прстите ќе ги постави на градниот кош под дојката (показалецот се потпира на базата на градата). Со палецот може да притисне на врвот на градата.
  8. Цицањето е бавно, длабоко и силно, проследено со паузи. Притоа може да се слушне голтањето на бебето.
  9. Ако мајката почуствува болка при обидот за доење, тоа треба да се прекине истото со вовлекување на прст во устата на бебето и повторно да се обиде со истата процедура за доење.
  10. При доењето бебето дише низ ноздрите. Со прстите на ареолата, мајката му овозможува доволен простор на бебето за дишење.
  11. Пожелно е да се менуваат положбите на доење. Со тоа се олеснува дренажата на сите канали и се превенира застој на млеко во градата.
  12. Пожелно е бебето да цица од двете гради или наизменично од секоја града.
  13. Во првите месеци да не се користи шише или цуцла, бидејќи лесно може да се одвикне од цицање.

При првиот подој мајката треба да е релаксирана, мирна и самоуверена. Не треба да очекува премногу ни од себе ни од бебето. Не треба да се срами да побара совет за каков било проблем во врска со доењето. Потребно е време за да се воспостави доењето, а воедно и бебето да се навикне. Тоа може да потрае неколку недели, затоа мајката треба да биде трпелива. Поддршка од околината многу ќе значи за мајката.

Секое бебе си има свој стил на цицање. Некои веднаш почнуваат силно, други почнуваат бавно и подолго време. Имајте предвид дека бебето ужива и сака да биде на градата на мајката

За поуспешно доење мајката може да користи низа помагала со што доењето ќе се олесни и ќе биде попријатно:

  • Специјален градник со влошки. Тие се направени за да и овозможат на мајката лесна достапност на градата до бебето. Мајката треба да почека и да ги купи овие градници во последниот месец од бременоста за да биде сигурна да го одбере вистинскиот број и при тоа се купува еден број поголем од бројот кој одговара на 9 месец на бременост. Овој градник има цел да овозможи добра поддршка на градата. Треба да се одбегнуваат градници со жици бидејќи тие можат да притискаат на одводните канали и да доведат до застој на млеко. Градникот треба да биде памучен. Може да има влошки кои ќе спречат истекување на млеко.
  • Комотна облека.
  • Удобен стол за доење, кој обезбедува добра поддршка на грбот, а има и потпирач за рацете. Некои мајки повеќе сакаат традиционална нишалка при што за време на доењето лесно можат да се нишаат. За дополнителен комфор ногата може да се крене на столче.
  • Перница која се поставува во прегратка на која лежи бебето со што бебето е постабилно и во поприродна положба поблиску до градата.
  • За време на подоите, покрај мајката треба да има чаша со вода. Мајката треба да пие течности пред и по доењето. Никогаш да не ја запоставува својата жед.

(продолжува)