Д-р сци. Сајковски и доц. д-р Ставриќ: Предвреме родените бебиња имаат поголеми потреби од млеко

Пожелно е да се дојат затоа што млекото кое го создава нивната мајка е специјално прилагодено за потребите на недоносеното бебе. Тоа е побогато со протеини, соли, калциум, железо и азот

Пишуваат:
Д-р сци. Александар Сајковски, педијатар и доц. д-р Катарина Ставриќ, имунолог- педијатар

 

 

 

 

Колку долго да се дои бебето? За ова прашање нема точен одговор. Пожелно е да се дои барем првите 6 месеци, а тоа може да продолжи и по почнување со дохранувањето. Кога да се прекине со доењето зависи и од мајката. Некои мајки прекинуваат со доење кога ќе тргнат на работа, а некои кога детето ќе добие заби, велат д-р сци. Сајковски и доц. д-р Ставриќ. Тие, исто така, објаснуваат како изгледа замената на подои со адаптирано млеко, кои витамини се неопходни за бебето и какви потреби за млеко имаат предвреме родените и болните бебиња.

И при хранење со шише, мајката треба да оствари близок контакт со бебето
ЗАМЕНА НА ПОДОИ СО АДАПТИРАНО МЛЕКО

Доколку мајката сака одреден подој да замени со адаптирано млеко, потребно е да се замени еден ист подој со адаптирано млеко секој трети ден. Со тек на време (3-7 дена) телото ќе се навикне во дадениот термин да создава помалку млеко.

При замена на еден подој со адаптирано млеко, пожелно е адаптираното млеко да го даде таткото, бидејќи бебето го чуствува мирисот на мајката и мајчиното млеко и одбива да го прифати другото млеко. Ако бебето одбива да прифати шише, смирете го и повторно обидете се по неколку дена.

При хранење со шише, тоа треба да се затопли. Доени деца сакаат повеќе топло млеко кое е поблиско до мајчиното млеко.

И при хранење со шише, мајката треба да оствари близок контакт со бебето (кожа до кожа допир).

Потребен е мир и тишина, а мајката со благ говор да му се обраќа на бебето.

Некои деца лесно се навикнуваат на шише, други потешко. Потребна е трпеливост и ако бебето не сака да прифати шише, треба повторно да се обидете по неколку дена

Постојат состојби кога бебето го губи интересот за цицање. Тоа обично се случува во период кога почнува да се движи и да прави работи кои дотогаш не можело да ги прави. Тоа е возбудливо за него и го губи интересот за цицање.

Други причини за одбивање на цицање се:

  • потреба за други хранливи производи (во период на воведување на друга храна);
  • настинка или вирусна инфекција;
  • губење на апетитот.

Можно е и исхраната на мајката (брокули, кромид, лук, зелка) да предизвика проблеми кај бебето, па тоа одбива да цица. Тогаш мајката треба да направи пауза во внесувањето на таа храна и да види дали тоа ќе влијае врз апетитот на бебето.

Колку долго да се дои бебето? За ова прашање нема точен одговор. Пожелно е да се дои барем првите 6 месеци, а тоа може да продолжи и по почнување со дохранувањето. Кога да се прекине со доењето зависи и од мајката. Некои мајки прекинуваат со доење кога ќе тргнат на работа, некои кога детето ќе добие заби. Не постои некоја граница кога треба да се прекине со доењето. Детето може да се дои до 2 години или да се прекине околу 6 месец. Но имајте предвид дека секој месец на доење е придонес за развој на здраво дете.

ДОПОЛНУВАЊЕ НА ВИТАМИНИ

Кај бебето е неопходно внесување на:

  • Витамин Д во тек на целата прва година.
  • Витамин К во тек на првите три месеца во форма на капки за превенција на доцен К витамин дефицит.
  • Омега-3 масни киселини за развој на мозокот.
  • Флуориди ако водата не е флуорирана.
  • Железо помеѓу 4-6 месец преку цералии збогатени со железо.
  • Витамин Б12 ако мајката е вегетаријанец.

 ПРЕДВРЕМЕ РОДЕНИ БЕБИЊА И БОЛНИ БЕБИЊА

Предвреме родени бебиња се оние кои се родени пред 37 гестациска недела и имаат тежина помала од 2 500 грама. Постојат и бебиња родени во термин, но сo тежина помала од 2 500 грама, тоа се т.н. бебиња со помала тежина за гестациска старост.

Предвреме родените имаат поголеми потреби од млеко. Пожелно е да се дојат затоа што млекото кое го создава нивната мајка е специјално прилагодено за потребите на недоносеното бебе. Тоа е побогато со протеини, соли, калциум, железо и азот. Лесно се вари и подобро се поднесува од страна на недоносеното бебе. Тоа обезбедува и антиинфективни фактори кои го штитат бебето од инфекции. Колостралното млеко помага и во излачувањето на билирубинот, со што се спречува појава на жолтица. Мајчиното млеко содржи и значаен број на ензими и хормони, вклучувајќи и фактори на растење кои придонесуваат за развој на мозокот на бебето.

Бебиња помали од 30-32 гестациска недела, обично се задржуваат во породилиште или во болница и се хранат со назогастрична сонда

Се користи измолзено млеко кое се става преку сондата. Одреден број на подои можат да се дадат со лажичка и ако вака спроведената исхрана се одвива, бројот на оброците со лажичка може да се зголеми во однос на оние преку сонда. Со тоа се стимулира рефлексот на цицање.

  • По 32 гестациска недела бебето може да цица и да се става на града. Во почетокот подоите траат кратко, поради брзото заморување на бебето, па поради тоа по секој обид за цицање бебето треба да се дохрани со измолзено млеко. Пожелно е почесто доење, односно 8-12 подои во текот на 24 часа.

                                                                                                                  (продолжува)