Овошјето и зеленчукот се познати по огромните количини на витамини, минерали, и други хранливи состојки кои се потребни за правилно функционирање на организмот. При консумирање на овошје и зеленчук, вообичаено се отстранува лушпата од плодот. Меѓутоа, малку луѓе знаат дека токму лушпата од овошјето и зеленчукот содржи поголема количина витамини отколку внатрешноста. Тешко е да се замисли, на пример, кивито да се јаде со кора, меѓутоа во некои земји не го лупат, како и бананата.
Овошјето и зеленчукот содржат одредена синергија, што значи дека ако се разделат кората, јадрото и стеблото, се губи целосниот интензитет на овошјето, се наведува во едно истражување.
Митот за задолжителното лупење на овошјето и зеленчукот, веројатно има голема поврзаност со појавата на пестициди во минатиот век и глобаното запознавање за нивното штетно делување. Од тогаш некои работи се промениле: најштетниот пестицид ДДТ е забранет, се повеќе овошјето и зеленчукот се одгледуваат органски (за жал некогаш тоа се наведува исклучиво за маркетиншки цели, додека вистината е поинаква). Меѓутоа, ако купените јаболки ги оставите да отстојат половина час во посолена вода, па потоа да ги измиете со чиста вода, ќе бидете сигурни дека евентуалните токсини исчезнале. Истото важи и за сите овошја и зеленчуци.
Ова се некои плодови кои може да се јадат со лушпата:
Компир, морков, краставица…
Лушпата од компир ја содржи дневната потребна количина на влакна, калиум, железо и витамин ц. Секако, потребно е да се свари заедно со компирот или да се испече.
Банана
Кората од бананата е богата со серотонин, супстанца која е важна за расположението, па затоа може да ја ублажи депресијата. Исто така, внатрешниот бел дел од кората може да се користи за нега на забите, бидејќи содржи калциум, калиум и витамин Д.
Ананас, тиква, тиквичка
Кората од ананас веројатно ќе ви биде многу тврда за консумирање, меѓутоа, колку потенко го излупите, ананасот ќе има повеќе хранливи материи. Ананасот е богат со ензимот бромелаин, кој помага при нецелосно сварената храна која е заостаната во цревата и желудникот. Ако ви е тврда, кората исто така може да ја измиксирате во сок. Статистиките покажале дека во Романија, населението има најмалку проблеми со болести на простата. Причина за тоа е навиката често да се консумираат семки од тиква кои содржат цинк, кој е многу важен за правилно функционирање на простата. Тука уште е и бета-каротенот кој го штити срцето и делува антиканцерогено.
