Научниците од американскиот Национален институт за здравје ја истражувале токму оваа проблематика и дошле до заклучоци и препораки за кои сметаат дека би требало веднаш да се усвојат. Врз основа на студијата во која учествувале 1228 млади Американки кои биле бремени меѓу 2007 и 2011 година, авторите утврдиле дека максималната поднослива дневна доза кофеин за трудници е 200 мг. Ова количество кофеин се наоѓа во отприлика 2 филџани кафе. Од друга страна, филџанот црн чај во зависност од видот и должината на подготовката содржи од 20 до 60 мг кофеин. Енергетските напитоци обично содржат од 60 до 80 мг кофеин на 250 мл, а кока-колата 24 до 32 мг на 250 мл.
Меѓутоа, прекумерното консумирање кофеин може да го зголеми ризикот од спонтан абортус, особено во првото тромесечје од бременоста, како и да го зголеми ризикот за помала тежина на бебето при раѓањето што за возврат може да се поврзе со здравствени проблеми во иднина како што се респираторни и мускулни тегоби. Заради ова се препорачува драстично намалување или дури и потполно откажување од кафе и кофеински напитоци во текот на првото тромесечје од бременоста, а потоа ограничување на дневниот внес на кофеин на максимални 200 мг.
Научниците, исто така, предупредуваат дека и чоколадото содржи кофеин – млечното околу 20 мг на 100 г, додека во црното со 70 % какао делови има од 80 до 120 мг кофеин.
