Децата кои слушаат музика од преносни уреди, како што е паметен телефон или таблет, со помош на слушалки, може да се изложени на поголем ризик од загуба на слухот, поврзана со бучава, покажало данското истражување.
Истражувачите ги проучиле резултатите од тестирање на слухот на 3 316 деца на возраст од 9-11 години, а нивните родители биле интервјуирани колку често нивните деца ги користат слушалките и колку гласно слушаат музика.
Тие откриле кај 443 деца односно 14 проценти од испитаниците одредени проблеми со високите фреквенции. Губење на слухот за високи фреквенции, особено кај младите луѓе, е поврзано со изложување на бучава.
Без разлика на тоа колку долго ги користеле слушалките или колку гласно слушале музика децата кои користеле преносни уреди за да слушаат музика и тоа само еден или два дена во неделата имале повеќе од два пати поголеми изгледи од губење на слухот од децата кои не ги користеле уредите
„Иако не можеме да заклучиме врз основа на ова истражување дека преносните уреди го предизвикуваат тоа губење на слухот, сепак, тоа покажува дека изложеноста на музика може да влијае врз слухот во детството“, изјавил лидерот на студијата д-р Карлејн Ле Клерк од Универзитетот Еразмо во Ротердам. „Ова е важно бидејќи губењето на слухот е неповратно и има последици за целиот живот“, изјавил Клерк.
За ситуации во кои децата можат да бидат изложени на бучава треба да имате подготвено чепчиња за уши
Повеќе од 90 проценти од постарите деца користат некаков пренослив уред за слушање музика, како што е паметен телефон или таблет, навеле авторите на истражувањето во статијата објавена во списанието „JAMA Otolaryngology – Head and Neck Surgery“.
Резултатите од студијата укажуваат дека родителите треба да бидат повнимателни како и колку нивните деца ги користат слушалките, вели Кевин Франк од Медицинскиот факултет во Бостон. „Родителите би морале да го ограничат времето на користење на такви уреди“, вели тој. Тие се прегласни доколку нивните родители, и покрај слушалките, можат да слушнат што слушаат нивните деца, додал тој.
Колин ле Прел од Универзитетот Тексас во Далас напоменува дека слушалките не се единствениот начин за губење на слухот кај децата, додавајќи дека тоа може да се случи и со концерти во живо, со вежбање на инструменти, лов, машини и бучни алати, мотори.
„Ограничување на употребата на преносни музички уреди треба да се смета како дел од сеопфатната стратегија за безбедно слушање“, изјавил Ле Прел, додавајќи дека за ситуации во кои децата можат да бидат изложени на бучава треба да имате подготвено чепчиња за уши.
