На прагот сме на сезоната на грип и секој човек се плаши дали овој пат имунитетот ќе успее да ги преброди вирусите. Освен тоа, луѓето боледуваат на различен начин. Некои успеваат да ги поминат настинката и грипот на нозе, додека други поминуваат и по две недели во постела.
Сега научниците откриле една значајна карактеристика за тоа кои луѓе боледуваат подолго. Според научниците од Универзитетот во Мичиген, станува збор за дебелите луѓе кои се заразни речиси два пати подолго време од другите кога боледуваат од грип.
Специјалистите испитале 1 800 лица за време на три сезони на грип. Се покажало дека пациентите со прекумерна тежина болни од грип А ја ширеле заразата 42 % подолго време, во споредба со оние со нормална тежина.
Резултатите ги наведуваат научниците до заклучок дека дебелите луѓе треба да бидат приоритетна цел во превенцијата од грип, вклучувајќи ги и вакцините против грип. Веќе е познато дека болните лица се изложени на повисок ризик од здравствените компликации после заболувањето од грип. Станува збор за пневмонија, а вирусот на грип трае подолго. Сепак, досега никој не се сомневал дека овие луѓе можат да бидат заразни подолг период од останатите. Причината е тоа што дебелината го слабее имуниот систем на организмот, кој не може да се избори со заразата и вирусот, па грипот се задржува подолго време.
