Дебелината наскоро може да стане најчест причинител за појава на рак кај жените кој може да се спречи и на тој начин пушењето веќе нема да биде прв ризик фактор за ова заболување, предвидува Центарот за истражување на карциноми во Британија.
Денес, според нивните податоци, 12 % од туморите кај жените се поврзани со пушењето, а 7 % со прекумерната телесна тежина и дебелината.
Но, со оглед на податокот дека бројот на пушачи опаѓа, а бројот на лица со прекумерна телесна тежина се зголемува, разликата во процентот на предизвикани тумори ќе исчезне за најмногу 25 години.
Веќе во 2035 година, разликата ќе биде минимална, предвидуваат стручњаците велејќи дека до тогаш на подрачјето на Велика Британија околу 10 % од сите тумори кај жените ќе бидат поврзани со пушењето, а над 9 % со прекумерната тежина.
Кај мажите Британци не е воочлива таква промена во делот на причинителите на рак, бидејќи пушат многу поголем број на мажи од жени. И, иако дебелината е почеста меѓу мажите, прекумерната тежина кај жените е многу посилен тригер за развој на рак во однос на мажите.
