Да се спасат сите деца, без разлика каде живеат! – е главната порака од одбележувањето на денешниот Меѓународниот ден на децата заболени од малигни болести, кој е воспоставен во 2002 година, а се одбележува во повеќе од 150 земји ширум светот.
За првпат во 2002 година, па се до денеска, 15 февруари се одбележува како потсетник на најтешките заболувања, од кои во Европа годишно заболуваат околу 17 000 деца на возраст до 15 години. Меѓународниот ден на децата заболени од малигни болести (International Childhood Cancer Day) се одбележува во многу земји во светот, истовремено потсетувајќи ја целата јавност дека малигните болести претставуваат втора причина за смрт на децата. Имајќи ја предвид чувствителноста на денот кој е посветен на најмалите, најмилите и најкревките, целтa е да им помогне на децата болни од рак да добијат најдобар можен третман и нега, без разлика каде живеат, како и да се подигне свеста за ракот кај децата и да се обезбедат финансиски средства за истражувања и нови поефикасни третмани.
На глобално ниво, детскиот и адолесцентниот рак се закануваат да ги претркаат заразните болести, како една од главните причини за смртност поврзана со болести кај децата
Статистичките податоци велат дека во светот годишно од малигни болести заболува секое 500-то дете, а успешноста во лекувањето во земјите од Западна Европа изнесува 75 проценти. Бројката на новозаболени деца од малигни болести е во пораст и во земјава, а најчесто малигно заболување е леукемијата.
Златната лента која го одбележува 15 февруари е симбол на децата кои се борат против ракот. Креирана е во 1997 година во САД на иницијатива на група родители кои укажале на потребата од создавање универзален симбол на свест и мобилизарање на поголемо внимание насочено кон намалување на смртноста и инвалидитетот поради ракот кај децата. Златото прикажува колку се децата благородни и непроценливи. Исто така, е совршен симбол за патот кој децата го минуваат во борбата против ракот, исто како и златото, кое минува низ процес на обработка и топење и станува појако. Децата заболени од рак минуваат низ такво искуство, создавајќи отпорност при соочувањето со тешкотиите и болните предизвици на ракот.
Меѓународниот ден на децата заболени од рак е заснован на верувањето дека секое дете кое има рак заслужува најдобра можна медицинска и психолошка нега, независно од земјата на потекло, расата, финансиската состојба или социјалната класа. Исто така, се заснова и на претпоставката дека смртноста од рак кај децата може да се избегне со навремена и точна дијагноза, како и достапноста на соодветно лекување и лекови.
Во однос на превентивните мерки се препорачуваат редовни систематски прегледи. Благодарение на редовните посети на лекар, поголема е веројатноста за зачувување и унапредување на здравјето, сузбивање и рано откривање на болеста.
15 февруари, Меѓународен ден на децата заболени од малигни болести, ја нагласува потребата за заеднички глобални акции за решавање на растечкиот предизвик предизвикан од оваа болест. На глобално ниво, детскиот и адолесцентен рак се закануваат да ги претркаат заразните болести, како една од главните причини за смртност поврзана со болести кај децата.
Треба да се направи уште многу. Според IARC (2015), пријавената светска инциденца на рак во детскиот период се зголемува: од 165 000 нови случаи годишно на 215 000 случаи на деца на 14-годишна возраст и помлади, и 85 000 нови случаи на 15 -19-годишници. Многу случаи остануваат нерегистрирани и непријавени поради недостатокот на регистри за рак во детството во голем број земји.
Во моментов, местото на живеење ја детерминира шансата за преживување на децата заболени од рак
И додека бројот на деца со рак е многу помал во споредба со глобалната инциденца на возрасни заболени од рак, бројот на спасени животи е значително поголем. Имено, стапките на преживување во земјите со високи примања достигнуваат просек од 84 % и постојано се подобруваат дури и во области со помалку ресурси во светот каде што има локална и меѓународна поддршка.
Крајната цел на кампањата на ICCD и обединета порака е „Advance Cures and Transform Care“. Оваа порака ги нагласува нееднаквостите и диспаритетот на пристапот до грижата во повеќето земји со низок и среден приход каде што живеат 80 % од децата со рак. Децата и адолесцентите во Африка, Азија и Латинска Америка и во делови од Источна и Јужна Европа се уште немаат пристап до соодветен третман, вклучувајќи ги и основните лекови и специјализираната нега. Во моментов, местото на живеење ја детерминира шансата за преживување на децата заболени од рак.
„Шансата за лек, шансата за живот, не треба да биде несреќна случајност на географија. Не постои ништо пострашно отколку да сфатите дека вашето дете има рак. Сепак, нема ништо потрагично да знаете дека третманот и лекот постојат за конкретниот рак на вашето дете и даваат одлични резултати, но… Тоа не е достапно за вашето дете! Зошто? Бидејќи вашето дете случајно живее на погрешна хемисфера! Време е да се преземат дејства за да се спречи ова сурово злосторство… Нека се слушнат вашите гласови на Меѓународниот ден на децата заболени од рак и барањето до светските лидери да дејствуваат и да помогнат да се спасат сите деца, без разлика каде живеат!“, истакнала принцезата Дина Миред од Јордан, мајка на дете кое го победило канцерот, и претседателка на Унијата за меѓународна контрола на ракот (Union for International Cancer Control (UICC), во својата порака на Меѓународниот ден на децата заболени од канцер.
(К.Ш.Д.)
