Здравјето на децата е директно поврзано со нивото на образование на нивните родители, покажало новото германско истражување. Не е потребен докторат за да се биде добар родител. Сепак, образованието може да има многу поголемо влијание отколку што мислиме.
Неодамна спроведеното истражување во Германија покажало дека образованите родители имаат поздрави деца.
На децата чии родители немаат универзитетски дипломи почесто им се препишуваат лекови и тие почесто одат во болница за разлика од децата чии родители се високо образовани, велат резултатите на истражувањето на деца и адолесцентите, спроведено од страна на германска организација за јавно здравствено осигурување
Разликата е особено забележителна кога станува збор за расипани заби и дебелина, кои се забележани три пати повеќе кај децата со помалку образовани родители. Слична поврзаност се појавува и во поглед на развојот на нарушувањата во однесувањето.
„Степенот на образование на родителите има поголемо влијание отколку што се очекуваше“, изјавил шефот на Организацијата за јавно здравствено осигурување, Андреас Шторм, сугерирајќи дека болестите на децата често се поврзани со начинот на живеење на нивните родители.
Волфганг Грајнер, професор за здравствената економија и еден од авторите на истражувањето, изјавил дека за здравјето на децата би било покорисно да се вложува во образованието, отколку да се зголемува домашниот буџет.
Истражувањето е базирано на податоци од речиси 590 000 деца и 430 000 родители на кои Организацијата им обезбедува здравствено осигурување.
