И покрај зголемување на стапката на преживување за многу видови на карцином, дијагнозата рак се уште може да биде многу вознемирувачка кај пациентите, и може да го зголеми ризикот од самоубиства, покажува нова студија.
Истражувањето ги анализирало податоците на 4,7 милиони британски пациенти на кои им бил дијагностициран рак во периодот од 1995 до 2015 година. Се покажало дека ризикот од самоубиство бил за 20% поголем кај пациентите болни од рак, во споредба со општата популација. Треба да се истакне дека ризикот од самоубистви бил највисок во првите шест месеци по поставување на дијагнозата на карцином.
Ризикот од извршување самоубиство бил најголем кај пациентите кои биле заболени од рак на панкреасот, на желудникот, на белите дробови и на хранопроводот.
Се претпоставува дека за зголемување на ризикот од извршување на самоубиство допринесува стравот на пациентите од смрт или страдање од нуспојавите или промените во нивниот квалитет на живот.
Инаку, познато е дека некои пациенти со рак може да станат подепресивни или анксиозни како психолошка реакција на дијагнозата, лекувањето, рецидивот, крај на животот или преживување.
