Чија семето во последните неколку години е се попопуларно и се наметнува како честа состојка во рецептите за здрави јадења. И чија и лененото семе се богати со разни нутритиенти, благодарение на кои поволно делуваат на кардиоваскуларното здравје и помагаат во регулирањето на нивото на шеќер во крвта и во превенцијата од некои типови карциноми.
Чија семето е нешто помалку калорично од лененото и содржи повеќе влакна. Ова семе, исто така, содржи и повеќе калциум и фосфор, минерали кои се исклучително важни за здравјето на коските. Од друга страна, лененото семе содржи повеќе омега-3 масни киселини (2 133 мг на 1 супена лажица, наспрема 1 633 мг на истото количество чија семе).
Лененото семе содржи 15 пати повеќе лигнани, антиоксиданти кои ги намалуваат шансите за појава на карцином на дојките и простата, и го забавуваат напредувањето на овие болести. Кога станува збор за контролата на апетитот лененото семе е нешто поефикасно по ова прашање со оглед на тоа дека содржи повеќе растворливи влакна во споредба со чијата. Уште една позитивна карактеристика на лененото семе е цената, која обично е пониска од онаа на чијата.
Значи, и лененото и чија семето имаат мноштво позитивни нутритивни својства и на вас е, во зависност од вкусот и здравствените потреби, да се определите кои семки ќе ги користите во исхраната.
