Дињата е овошје кое спаѓа во истата фамилија со лубеницата, тиквата и краставицата. Богата е со витамини и минерали, а содржи и голем процент на витамини Ц и Б, бета-каротен, како и калциум, калиум, магнезиум, фосфор и железо. Колку за споредба, дињата содржи три пати повеќе калиум од лубеницата. Содржи голем процент вода, околу 95%, и ниско ниво на шеќер. Токму заради високиот процент на вода одлична е стимулација на работата на бубрезите, помага во регулирањето на крвниот притисок, а високото ниво на влакна помагаат при варењето на храната. Бета-каротенот е моќен сојузник во борбата против туморите, а низа истражувања покажале дека ова овошје може да се користи во борбата против неколку вида рак.
Одлична е за детоксикација на организмот, како и во процесот на отстранување на натриумот од телото, при што се намалува високиот крвен притисок. Сокот од диња може да помогне и за ублажување на болка, доволно е болното место да го премачкате со сок од диња или да ставите неколку парчиња како облога. Исто така, ефикасно средство е и во ублажувањето на болките како резултат на убод од инсекти и изгореници. И можеби најубавиот дел – содржи малку калории, па затоа е идеална доколку сте на режим на исхрана и сакате да загубите некој килограм.
