Поради ниската енергетска вредност и високата содржина на вода, дињата е многу популарна и особено препорачлива во топлите месеци. Добредојдена е ако сакате да го искористите периодот на намален апетит и да изгубите некој килограм.
Сочното жолто-портокалово месо на плодот е ароматично, а во исто време и благо, па токму затоа дињата е идеална состојка на сите овошни купови и различни салати, совршено оди во комбинација со сладолед, но превкусна е и сама по себе, без никаков додаток. Покрај тоа, во нејзина корист одат и малиот број на калории – во 100 г диња има само 30 калории.
Дињата изобилува со витамин Ц (во 100 грама има 31 процент од препорачаната дневна доза), а некои видови се богати и со витамин А, во форма на бета-каротен
Во помали количини ги содржи повеќето од витамините од Б-групата, а од минерали железо, магнезиум, бакар, калиум, манган, фосфор.
СОСТАВ
Во 100 грама диња има:
- 91 г вода,
- 0,1 г маснотии,
- 0,8 г протеини,
- 7,9 г јаглехидрати,
- 8 г шеќер,
- 0,9 г влакна.
Благодарение на висококвалитетните состојки дињата го штити телото од развој на кардиоваскуларни болести и предвремено стареење, а е заслужна и за други здравствени придобивки.
- Витамините Ц и А (бета-каротен) делуваат како антиоксиданти, заштитувајќи го телото од кардиоваскуларни болести и стареење, а помага и на здравјето на кожата;
- Водата и калиумот ја стимулираат функцијата на бубрезите и помагаат во отстранување на штетните материи од организмот. Калиумот, исто така, го намалува и крвниот притисок;
- Растителни влакна го олеснуваат варењето и помагаат во намалување на телесната тежина. Покрај тоа, помагаат и во елиминирање на гасовите, кои се појавуваат при процесот на варење на храната;
- Поради високата содржина на бета-каротен, дињата се вбројува меѓу антиканцерогената храна.
