Оваа година мотото на кампањата е:
Инвестирајте во доење, инвестирајте во иднината
Фактите се едноставни. Доењето е природен, моќен начин да им се даде на бебињата најдобар почеток во животот – зајакнување на нивниот имунолошки систем, помагање во борбата против болести – сега и во иднина – и обезбедување витална удобност и исхрана.
Ова значи да се обезбеди секоја мајка да има пристап до поддршката и информациите што ѝ се потребни за да дои сè додека сака – преку инвестирање во стручно советување за доење, спроведување на Меѓународниот кодекс за маркетинг на замени за мајчино млеко и создавање средини (дома, во здравството и на работа) што ги поддржуваат и помагаат доилките.
Доењето обезбедува надежна иднина не само за децата, туку и за општествата. Ги намалува трошоците за здравствена заштита, го поттикнува когнитивниот развој, ги зајакнува економиите и им дава на децата здрави почетоци.
Обезбедува здравствена, нутритивна и емоционална корист како на детето така и на мајката. Светската здравствена организација – СЗО го поттикнува доењето како единствен начин на хранење започнувајќи од првиот час после раѓањето па се додека бебето не наполни шест месеци, кога може да се отпочне со воведување и на дополнителна исхрана.
Доењето на секое дете му обезбедува најдобар можен почеток на животот.
Зошто за детето?
- Затоа што мајчиното млеко е единствената потполна храна за новороденчето. Составот на мајчиното млеко се прилагодува спрема индивидуалните потреби на детето и обезбедува оптимален внес на хранливи материи за правилен раст и развој.
- Мајчиното млеко го поттикнува развојот на имунолошкиот систем кај детето и го намалува ризикот од инфекции. Антителата кои се содржат во него, а преминуваат од мајката, го штитат од болестите кои ги прележала мајката. Богато е и со полинезаситените масти и цинк кои помагаат во создавањето на сопствениот одбранбен систем.
- Тоа полесно се вари во споредба со животинските млека и адаптираните формули.
- Мајчиното млеко содржи „бифидус” фактор, кој стимулира раст на специфични бактерии (Lactobacillus bifidus) кои го спречуваат растот и размножувањето на штетни бактерии во гастроинтестиналниот тракт на детето.
- Научно е потврдено дека децата кои се доени, поретко заболуваат од одредени болести (дијареја, гастроинтестинални и респираторни инфекции, и др.) и имаат намален ризик од развивање на алергии.
- Децата кои се дојат имаат по правилен анатомски развој на вилицата и тврдото непце, и помалку развиваат ран детски кариес на млечните заби.
- Доените деца помалку развиваат дебелина и проблеми поврзани со тоа отколку недоените.
- Доењето го смирува бебето и обезбедува чувство на сигурност.
- Доењето ја поттикнува интелигенцијата кај бебето.
- Доењето го намалува ризикот од ненадејна смрт на новороденчето (Sudden Infant Death Syndrome – SIDS)
Зошто за мајката?
- Го намалува ризикот од постпартална (постпородилна) депресија
- Ја зголемува самодовербата кај мајката и допринесува до побрзо физичко закрепнување по породувањето.
- Доењето ги поттикнува контракциите на матката и со тоа допринесува да се намали постпородилното крварење и појава на анемија кај мајката.
- Мајките кои продолжено ги доеле своите деца имаат помал ризик од појава на малигни заболувања на јајниците, дојката или матката, како и појава на остеопороза.
Со цел доењето да биде успешно, на мајките им е потребна континуирана поддршка во сите фази од мајчинството, почнувајќи од периодот пред зачнувањето, во текот на бременоста и особено по породувањето, како во кругот на семејството, така и на работното место.
Сите можеме да се заложиме за поддршка на мајките. Семејствата, пријателите, работодавачите и заедниците играат улога во поддршката на мајките што дојат и создавањето средини за мајките да дојат во секое време, на секое место.
Општеството како целина треба да зборува гласно за поддршка на доењето и да бара и застапува политики што го олеснуваат доењето и го прават подостапно за сите семејства.
“Замислете светот да располага со нов производ од соништата кој овозможува да се нахрани и имунизира секое новородено на земјината топка.
Замислете тој да може да се добие насекаде и тоа бесплатно. А сега, замислете светот да одбие да го користи.
Ова сценарио не е само плод на фантазија.
Тој производ од соништата е мајчиното млеко..”
