![milksejk (2)](https://panacea.mk/wp-content/uploads/2018/04/milksejk-2-696x392.jpg)
Од порано е познато дека исхраната богата со заситени масти придонесува за ризик од развој на болести на срцето, но неодамнешното истражување на американските научници покажало дека и само еден таков оброк може да има долгорочно негативно влијание врз здравјето.
Имено, само еден оброк богат со заситени масти речиси веднаш резултира со промени во крвните садови и кај здравите луѓе, пишуваат истражувачите во списанието „Laboratory Investigation“.
Од Американскиот центар за контрола и превенција на болести (CDC) потсетуваат дека храната богата со заситени масти го зголемува нивото на холестеролот во крвта, како и ризикот од кардиоваскуларни болести, како што е атеросклерозата.
Повеќето луѓе знаат дека таков начин на исхрана долгорочно доведува до срцеви заболувања, но истражувачите од Медицинскиот факултет во Џорџија спровеле истражување сакајќи да утврдат дали е можно само еден оброк, богат со заситени масти, веднаш да има последици и дали е навистина толку штетен.
По завршувањето на една помала студија, одговорот бил потврден.
Истражувањето кое било спроведено на десет здрави мажи покажало дека јадењето само еден оброк со висок процент на масти, како што е, на пример, чоколаден милкшејк, резултира со нездрави промени во крвните садови и црвените крвни клетки
Во студијата учествувале здрави мажи кои испиле чаша милкшејк од полномасно млеко со шлаг и сладолед. Пијалакот содржел 80 грама масти и 1 000 калории. По само четири часа лабораториските тестови покажале дека крвните садови на испитаниците се помалку еластични, а дел од црвените крвни клетки, кои се мазни и плочести, се промениле и станале „шилести“.
![](https://panacea.mk/wp-content/uploads/2018/04/hamburger-750x750.jpg)
„Оваа промена може да влијае на крвотокот“, изјавила Џулија Британ, професор по анатомија и клеточна биологија на Универзитетот во Џорџија. Добрата вест е дека штетните промени исчезнале по осум часа.
„Не треба да кревате паника ако сте изеле хамбургер и голем милкшејк, бидејќи последиците од таков оброк со висок процент на масти за здравите луѓе се привремени, но тоа никако не смее да ви премине во навика“, предупредува Британ. „Вашиот организам може да се справи со ова ако наредните оброци не се исти.“
Научниците истакнуваат дека се работи за студија спроведена на мал број испитаници. Тие, исто така, велат и дека не знаат колку „шилестите“ еритроцити се опасни за здравјето на крвните садови, поради што се потребни дополнителни истражувања.
Американската асоцијација за срце (AHA) им препорачала на здравите лица да го ограничат дневниот внес на масти на 20 до 35 проценти. Според инструкциите на Клиниката Мајо за човек кој дневно троши околу 2 000 калории, тоа значи помеѓу 44 и 78 грама маснотии дневно.