Храната богата со диетални влакна дава подолго чувство на ситост, го намалува нивото на лошиот холестерол во крвта, но, исто така, го поттикнува и слабеењето.
Ако сакате да симнете неколку килограми, време е да ги вклучите мешунките во вашата исхрана. Неодамнешната студија покажала дека само еден оброк, на пример, 150 г грав, грашок, наут или леќа на ден, може да го забрза процесот на губење на тежината.
Канадската студија предводена од д-р Расел де Соуз покажала дека консумацијата на овој вид на храна богата со растителни влакна, го намалува нивото на лошиот холестерол за 5 отсто и така ја намалува можноста за развој на срцеви заболувања.
Покрај тоа ефикасно заситува и ги спречува ненадејните напади на глад кои во 90 проценти од случаите се виновни за неуспехот на диетите.
„Мешунките го зголемуваат чувството за ситост за 31 отсто, поради што испитаниците земале помалку храна. Иако тие не изгубиле многу килограми, резултатот покажува дека станува збор за храна која помага во губење на тежината, но, исто така, го спречува и јо-јо ефектот“, изјавила д-р Де Соуз.
Во големата студија која во тек на 24 години била спроведена во САД на 124 086 мажи и жени, било потврдено дека намирниците богати со влакна се клучни за одржување на фит фигура, а освен зеленчукот, во таа цел ќе ви помогне и овошје како јаболка, круши и шумски плодови.
