Истражување кое е неодамна направено на Кралскиот колеџ во Лондон, во кое биле испитани 545 трудници, покажало дека една од четири жени за време на бременоста пати од некоја ментална болест.
На трудниците им биле поставувани прашања за време на прегледите, а ги прашувале за нивното расположение така што им било давано да довршат 10 реченици за својата ментална состојба. Се покажало дека една од четири жени се соочува со некаква ментална болест или пореметување за време на бременоста.
Единаесет проценти од нив биле депресивни, 15% анксиозни, 2% имале пореметување во исхраната и уште 2% од трудниците страдале од опсесивно-компулсивно пореметување. Многу од нив имале и комбинација од неколку ментални болести.
Научниците веруваат дека до сега овие болести кај трудниците поминувале незабележани, поради општото верување дека жените се чувствуваат одлично и се полни со живот додека го очекуваат раѓањето на своето дете.
„Бременоста е време на бројни промени„, вели психологот д-р Камила Росан од Организацијата за ментално здравје. „Жените во бременоста се запрашуваат за својот идентитет, за тоа каква мајка ќе биде, а понекогаш и се јавуваат и трауми од сопственото детство. Тоа се потенцијаталните причини за појава на менталните болести„, додава психолохот.
Менталните болести кај трудниците може да влијаат на развојот на детето, па затоа треба на време да се препознаат и на жените да им се пружи соодветна помош, за да не патат во тишина и да не бидат под притисок за време на бременоста.
