Заморот како состојба може да се јави во било кој период од годината, но најчест е при промената на годишните времиња – од зима во пролет и од лето во есен. Додека некои луѓе можат во одредени денови да си дозволат нешто помалку работа, повеќето од луѓето, сепак мора поголемиот дел од денот да го поминат во извршување на разни задачи, и да ги завршат сите деловни обврски. За среќа, постојат одредени начини со кои ќе може релативно лесно, повторно да се зголеми нивото на енергија.
Енергетска храна
Не станува збор за чоколади и енергетски барови, туку за храна богата со протеини и сложени јаглехидрати. Овие состојки ги има во житарките, во сирењето со помала масленост или во лебот од цели житарки, како и во путерот од кикирики. Ваков вид на храна долгорочно ќе ја зголеми енергијата, а е многу поздрава од чоколадото и од разни грицки.
Не го избегнувајте појадокот, бидејќи е многу важен за одржувањето на енергија преку целиот ден. Јадете намирници богати со јаглехидрати и влакна.
Земајте кратки одмори
Кога ќе почувствувате замор, и нагло паѓање на енергијата и концентрацијата, прекинете со работа на неколку минути. Станете, раздвижете се, излезете на свеж воздух, испијте малку вода. Токму ваквите кратки одмори ќе ви помогнат во совладувањето на заморот, како и во одржувањето на енергијата. За време на овие кратки одмори, ако почувствувате замор и глад, задолжително нешто изедете, по можност нешто здраво: овошје или јаткасти плодови.
Истражувањата покажале дека лицата кои работат на компјутер треба на секој час да одмораат по околу пет минути, а по три часа да направат пауза од 15 минути одмор, што на крајот ќе резултира со поквалитетно ниво на енергија преку целиот ден.
Медитирајте 5 минути
Бројни студии докажале дека кратките петминутни медитации може да направат чудо во подобрувањето на енергијата. За таков вид медитација не ви требаат некои посебни техники и вештини. Пронајдете мирно место, седнете, затворете ги очите и мислите концентрирајте ги на вдишување и издишување. Обидете се да не размислувате за ништо. Максимално опуштете се. Оваа вежба правете ја неколку пати на ден, вашето тело ќе има повеќе енергија, а вие ќе бидете посмирени и поопуштени.
Бегајте од негативци
Опкружете се со позитивни луѓе и ентузијасти, покрај кои и вие ќе бидете оптимисти, па и енергични. Иако понекогаш е невозможно да избегнете негативни луѓе, обидете се што помалку да бидете во нивна близина. Некои луѓе ја пренесуваат негативната енергија и луѓето околу себе ги депримираат што доведува до стрес и слично. Постојат и такви луѓе кои ја црпат енергијата од вас, ве оптоваруваат, ве претвораат во негативни лица. Избегнуввајте ги што е можно повеќе бидејќи емоциите се заразни.
