Експериментален лек се покажал ветувачки во продолжување на животот на жени кои патат од посебно агресивен и смртоносен тип на рак на дојка, укажува нова студија објавена во New England Journal of Medicine. Инаку, моментално примената на стандардната хемотерапија кај метастатскиот тројно негативен рак на дојка, не е премногу ефикасна. Се смета дека тоа може да се промени со примената на новиот лек sacituzumab govitekan, кој е конјугат на хуманизираниот анти –Trop-2, моноклоно антитело поврзано со SN-38, активен метаболит на irinotekan.
За време на истражувањето, околу една третина од пациентите одговориле позитивно на лекувањето, а ефектот траел и до осум месеци. Истовремено, кај нив е воочено и значајно намалување на карциномот на дојката.
Околу 50% од пациентиките имале некаков одговор и кај нив е воочено забавување на напредувањето на ракот за околу пет месеци.
Се смета дека овој експериментален лек може да биде поефикасен ако се дава порано, кога ракот се уште е ограничен само на дојката.
Тројно негативниот рак на дојка претставува околу 15% од сите карциноми на дојка и најлесто се појавува кај млади жени. Овој карцином се разликува од останатите видови на карцином по тоа што неговите туморски клетки немаат протеин HER2 (протеин на хуман епидермален фактор на раст 2), рецептори за естроген или рецептори за прогестерон, што значи дека хормонската терапија и лековите кои целат на HER2 се неефикасни во неговото лекување. Хемотерапијата го намалува или го забавува кај само 10 до 15% од пациентките, а тој ефект трае само до два или три месеци.
