Девет лица починале како последица на бактериска инфекција предизвикана од Listeria monocytogenes, присутна во замрзнат зеленчук (слатка пченка) на компанија од Унгарија. Заразата (досега) ја погоди Финска, Велика Британија, Шведска, Данска и Австрија. Се очекува бројката на заразени да расте.
Што е листериоза?
Листериоза е сериозна инфекција предизвикана од консумирање храна која е контаминирана со бактеријата Listeria monocytogenes. Најголем ризик за зараза доаѓа од суровиот зеленчук, месото, непастеризираното млеко и млечните производи, некои преработени производи, како што се меките сирења.
Симптомите на листерија најчесто се треска, болки во мускулите, гадење, дијареа, главоболка, вкочанетост во вратот, збунетост, губење на рамнотежа, грчеви
Дијагнозата се поставува на база на лабораториски наоди. Листериозата се третира со антибиотици, но оваа инфекција треба да се сфати многу сериозно, бидејќи стапката на смртност кај заразените е меѓу 20 и 30 проценти.
Бактеријата преживува во фрижидер
Европската агенција за безбедност на храна – ЕФСА во почетокот на годината предупреди дека се зголемува бројот на луѓе заразени со листерија, и тоа поради консумацијата на свежа, како и купечка приготвена храна.
-
Најосетливи се потрошувачите над 70-годишна возраст и жени на возраст од 25 до 44 години, а особено бремените жени. За овој тренд, велат експертите, придонело и модерното време и растот на консумација на купечка приготвена храна.
Повеќето луѓе се разболуваат по консумирање на храна како што е димена риба, приготвено месо и меки и полутврди сирења. До појавата на болеста доведува и консумирањето на готови салати.
Кога станува збор за зеленчук, најчесто се јавува како последица на консумирање сурова зелка, зелени салати, целер, домати, краставици, ротквици…
Експертите објаснуваат дека за разлика од останатите патогени, листеријата се размножува и на температура на која се чува храната во фрижидер. Карактеристично е што може да предизвика менингитис.
Кој е изложен на најголем ризик?
Тешката листериоза може да предизвика спонтан абортус ако не се лекува, па така бремените жени треба да се јават на лекар веднаш ако се посомневаат на болеста, пишува британски „Мирор“. Бремените жени треба да избегнуваат храна која носи најголем ризик од појава на листериоза, вклучувајќи ги сите видови паштети, непастеризирани млечни производи или недокрај зготвена храна, а во руралните места да се држат настрана од домашни животни што се пораѓаат. Бебињата и оние на возраст над 65 години, исто така, се изложени на поголем ризик.
Секој кој има состојба што го ослабува имунолошкиот систем, како дијабетес, или е подложен на третман што го ослабува неговиот имунолошки систем, како што е хемотерапија, а се сомнева на листериоза, веднаш треба да се јави на лекар.
Мерки на превенција – совети за намалување на ризикот од листериоза:
- Мијте ги рацете редовно со сапун и вода;
- Мијте го овошјето и зеленчукот пред да го јадете;
- Чувајте ја храната што е подготвена за јадење како што е препорачано од производителот;
- Не јадете храна по истекот на рокот на употреба, па дури и ако изгледа и мириса нормално;
- Згответе го замрзнатиот зеленчук пред го јадете, вклучително и ако го додавате во салати, смути или сосови;
- Следете ги упатствата на производителот и упатствата за готвење при подготовката на храна.
