Неодамнешно истражување направено од страна на група американски научници покажало дека оревите можат да го намалат ризикот од кардиоваскуларни заболувања. Оревите, имено, претставуваат добар извор на алфа-линолеинска киселина, омега-3 масни киселини кои помагаат во регулирање на зголемениот крвен притисок. Триесет грама ореви содржат дури 2,5 грама од овие омега-3 масни киселини, додека препорачаната дневна доза за мажите изнесува 1,6 г, а за жените 1,2 г алфа –линолеинска киселина.
Едно друго истражување, пак, укажало на поволниот ефект на оревите на нивото на липиди во крвта. Кај учесниците во истражувањето кои јаделе 43 грама ореви дневно во траење од 8 недели дошло до намалување на нивоата на вкупен холестерол, ЛДЛ холестерол и триглицериди за по 5 отсто. Зголеменото ниво на липиди во крвта е инаку сериозен фактор на ризик за појава на кардиоваскуларни болести. Освен високото количество на алфа-линолеинска киселина, за поволното кардиопротективно дејство на оревите заслужни се и други состојки како што се полифенолите, фитостеролите, витаминот Е, но и диететските влакна.
