Крушите се богати со важни антиоксиданти, флавоноиди и диететски влакна, и како составен дел од здравата, урамнотежена исхрана можат да помогнат во намалувањето на ризикот од појава на дијабетес тип 2, остеопороза, но и алергиска кивавица.
Една круша со средна големина има 100 kcal и дури 6 г влакна, па претставува идеална, освежителна ужина во текот на денот. Ова количество подмирува 12 отсто од дневните потреби за витамин Ц, 10 отсто за витамин К и 6 отсто за калиум. Крушите содржат помали количества калциум, магнезиум и железо, потоа витамин Б12, Б6 и фолна киселина.
Крушите го содржат и минералот бор кој е неопходен за одржување на здравјето на коските, додека витаминот К ги зајакнува коските и го спречува губењето на коскената маса со годините.
Благодарение на големото количество влакна, крушата помага при опстипација и забавено варење, како и го намалува ризикот од рак на дебелото црево. Доволниот внес на влакна се поврзува и со намален ризик од дијабетес тип 2 и коронарни болести.
Интересно е дека крушата претставува и овошје со низок ризик од алергија, за разлика од овошјата како што се јаболката, праските и кивито. Можно е оваа особина да има врска со фактот дека крушата спаѓа во овошјата кои лесно се варат, веројатно, како резултат на ниската содржина на киселина, особено во споредба со кивито и цитрусите како што се лимоните, грејпфрутот и портокалите. Со оглед на тоа дека содржи кверцетин кој делува како природен антихистаминик, претставува добар избор на овошје за личностите склони на алергиска кивавица.
