Алергените, мувлата и грините од валканите и лошо одржувани клима уреди може да предизвикаат алергиски реакции и астма, а најчесто се погодени луѓето со ослабен имунитет и хронично болните.
Поради валканата клима може да се појават и симптоми на воспаление, познато како „синдром на болна зграда“, а се појавуваат во згради со лоши системи за климатизација. Симптомите се различни, како што се проблеми со респираторниот систем, главоболки и психолошки проблеми, а се повлекуваат при престој надвор од зградата.
Лошо одржуваните клима уреди, исто така, може да предизвикаат и кожни промени, од благи до интензивни
Причината е во создавање на мувла и грини во самите уреди и вдишување на алергени додека климата работи. И други валкани честички, како и сув воздух, може да предизвикаат нарушувања системот за дишење кај лицата осетливи на алергии, но и хронични респираторни болести.
Ако климата не се одржува и не се чисти редовно, ризикувате инфекција со бактеријата Legionella pneumophilla, која предизвикува легионерска болест. Оваа бактерија предизвикува тешка пневмонија, која може да биде смртоносна.
Особено подложни се луѓето со ослабен имунитет, хронично болни, пушачи и алкохоличари. Се пренесува со вдишување на ситни капки од клима уредот, а симптомите се: опасно висока температура, над 40 степени, чувство на ладно, суво или продуктивна кашлица, болка во градите, главоболка, омалаксаност и дијареја. Се лекува со јаки антибиотици.
Порано смртноста од оваа бактерија била многу висока, но благодарение на напредокот во медицината, денеска смртноста изнесува само 5 отсто, а е последица на компликации од оваа болест. Покрај легионелата, од климата може да „фатите“ и коксаки вирус, чии симптоми се слични на обична настинка, но се придружени со висока температура. Проблемот е што е тешко да се препознае и е многу отпорен и долго се задржува во организмот.
Покрај алергените, вирусите и бактериите треба да се обрне внимание и на разликата во температурата помеѓу разладениот простор и надворешните високи температури. Имајте на ум дека разликата не треба да биде повисока од шест до осум степени.
Големи температурни разлики и ненадејни промени во температурата може да доведат до колапс. Дваесет минути до половина час пред да излезете од климатизиран простор исклучете ја климата за да може организмот полесно да се прилагоди на надворешните услови.
