Шпанскиот хит од деведесеттите години „Ла Макарена“ може да спаси живот, изјавиле шпанските истражувачи, кои советуваат да се држиме до ритамот на стариот летен хит кога практикуваме масажа на срцето.
Темпото на песната, објавена од групата „Лос дел Рио“ во 1995 година, им помогнала на луѓето да задржат стабилен ритам додека ја спроведуваат техниката за спасување на живот, открива последната студија, чии резултати биле презентирани на Европскиот конгрес на анестезиолози во Копенхаген, Данска
Истражувачите од Универзитетот во Барселона, Автономниот универзитет во Барселона и Универзитетска болница регрутирале 164 студенти по медицина, кои биле поделени во три групи, сите задолжени да применуваат масажа на срце на кукли во рок од десет минути.
Резултатите биле најдобри кај оние кои користеле метроном на апликација на мобилниот телефон, поставен на 103 отчукувања во минута. Во таа група, 91 отсто држеле вистински ритам.
Оние на кои им било советувано ментално да го следат ритамот на „Макарена“, 74 проценти го задржале вистинскиот ритам.
На крајот, само 24 отсто од оние кои биле замолени да изведуваат масажа без инструкции, следеле добар ритам.
„Макарена“ имала уште една предност: оние кои го следеле нејзиниот ритам брзо почнувале, додека оние кои го следеле метрономот „најмногу чекале со првата компресија“.
