Во сезоната на настинки и грип, еден од најлесните начини да го зајакнете имунолошкиот систем е да внесувате доволно минерали и витамини, поточно цинк.
Тоа е минерал кој е корисен за консумирање преку целата година, особено кога е студено и стануваме поподложни на вируси и болести.
Група диететичари за порталот People истакнаа зошто е важно да се консумира цинк и во која храна се наоѓа, па затоа не треба да го внесувате преку консумирање додатоци во исхраната и слични опции. Диететичарката Ејми Гудсон истакнува дека цинкот е суштински минерал кој игра клучна улога во многу телесни функции, вклучувајќи го имунолошкиот одговор , заздравувањето на раните, синтезата на ДНК и клеточната делба. Тој е особено важен за имунолошката функција бидејќи помага во активирањето на Т-лимфоцитите, познати и како Т-клетки, кои се клучни во одбраната на телото од патогени.
Диететичарката Џерлин Џонс се согласува, опишувајќи го цинкот како чувар на имунолошкиот систем.
„Делува како антиоксиданс, што значи дека помага во заштитата на клетките во телото од оштетувања предизвикани од слободни радикали“, изјави таа за People.
Храна што содржи цинк
Кога станува збор за внес на цинк, препорачаниот дневен внес е осум милиграми за жени и 11 милиграми за мажи. Бремените жени имаат потреба од малку повеќе цинк, 11 милиграми дневно, а доилките имаат потреба од 12 милиграми дневно. Ако се обидувате да внесете доволно цинк, најдобриот и најлесниот начин е преку храна.
„На пример, 80 грама посно мелено говедско месо содржи пет милиграми цинк, што е повеќе од 50 проценти од дневните потреби за жени и речиси 50 проценти за мажи“, вели Гудсон.
Сепак, постојат и други опции што можете да ги вклучите во вашето мени кои содржат доволно количини цинк. Диететичарката Ребека Расел ги издвои остригите како една од најдобрите намирници што можете да ги консумирате за внес на цинк.
„Тие се најдобриот начин да го внесете препорачаниот дневен внес на цинк. Покрај тоа, значителни количини на цинк се наоѓаат и во други животински протеини како што се месото, рибата и морските плодови, како и јајцата и млечните производи“, објаснува тој.
Вегетаријанците и веганите можат да ја добијат својата дневна доза на цинк со консумирање храна како грав, мешунки, јаткасти плодови, семиња и житарки, додаде диететичарката и нутриционистка Шаром Палмер.
На листата на диететичарот се наоѓаат и наут, леќа и овес, кои можете да ги консумирате на различни начини и да ги уживате, а воедно да внесувате и цинк во вашето тело, објавува Index.hr.
