Испирањето на вагината може да го зголеми ризикот од зараза со ХПВ – хуман папилома вирус, утврдува една понова студија. Методот кој го користат голем број жени, со цел да се ослободат од непријатниот мирис, може да предизвика последици кои долгорочно можат да бидат многу опасни. Научниците од Универзитетот во Тексас ја проучувале поврзаноста помеѓу вагиналното испирање и ХПВ вирусот кај 1 271 жена, на возраст помеѓу 20 и 49 години. Жените кои редовно ја испирале својата вагина имале двојно поголем ризик да заболат од рак на јајниците, покажува истражувањето. Студијата, која е објавена во „Journal of Infectious Diseases“ покажува дека испирањето на вагината го зголемува ризикот од зараза со поголем број на вирусни видови, и тоа за 26 проценти.
Многу позагрижувачки е фактот што испирањето на вагината го зголемува ризикот од инфекции со видови на ХПВ кои предизвикуваат рак, и тоа за 40 проценти. Исто така, се удвојува и ризикот од заболување од рак на јајниците. Лекарите ги предупредуваат жените да го избегнуваат вагиналното испирање бидејќи тоа може да ја поремети бактериската флора на вагината, поради што таа станува поподложна на воспаленија и инфекции.
„Вагината содржи многу повеќе бактерии од кој било друг дел од телото, но бактериите се таму со причина. Не знам во какви околности ваквото испирање би било корисно, бидејќи се што тоа прави е темелно чистење на вагината, вклучувајќи ги и добрите бактерии“, вели професорот Рони Ламберт.
