Според податоците на Центарот за контрола и превенција на болести, во САД 80 проценти од жртвите од КОВИД-19 се лица постари од 65 години, а меѓу нив најголемиот број се мажи. Со оглед на овој податок, се очекувало мажите постари од 65 години да бидат позагрижени и повнимателни кога се работи за вирусот. Но, истражувањето го покажало спротивното, дека оваа демографска група е онаа која најмалку се грижи за пандемијата.
Резултатите од истражувањето објавени во списанието “Герантолошки журнал“ укажуваат на фактот дека повозрасните мажи треба повеќе да се едуцираат за што подобро да сфатат колкав ризик претставува изложувањето на новиот коронавирус.
Американските научници поделиле анкетни листови во две старосни групи – една од 18 до 35 години, и втора од 65 до 81 година. Потоа ги замолиле испитаниците да одговорат за перцепцијата на ризикот, загриженоста и промените во своето однесување, како носење заштитна маска или зачестено миење на рацете во текот на пандемијата.
Студијата покажала дека повозрасните мажи се најмалку загрижени и дека своето однесување најмалку го прилагодиле од појавата на вирусот.
“Повозрасните мажи не само што искажуваат помалку негативни емоции во секојдневниот живот, туку и помалку боледуваат од посттрауматски синдром кој е последица од природни катастрофи и терористички напади. Во вообичаени околности и добро е кога не се грижат премногу за проблемите. Но, кога се работи за КОВИД-19, недоволната загриженост би можела да значи и помала примена на заштитните мерки и недоволна промена во однесувањето“, вели психологот Сара Барбер, автор на студијата.
